Það var spennuþrungið andrúmsloft í þessum bikarslag undir flóðljósum og rigningu í Árbænum. Fylkismenn hafa átt afar erfitt sumar en spiluðu virkilega vel á löngum köflum í kvöld. Þeir fóru hinsvegar illa að ráði sínu, fengu gríðarlegan fjölda góðra færa og þar á meðal vítaspyrnu. En ekki kom markið... nema jú reyndar sjálfsmark í framlengingu sem réði úrslitum.

Þegar Fylkir klúðraði víti í upphafi seinni hálfleiksins.

Bikarmeistarar Víkings eru komnir í undanúrslit þar sem þeir heimsækja Vestra á Ísafjörð í byrjun október. Víkingar eru klárlega sigurstranglegasta lið keppninnar og á möguleika á því að vinna tvöfalt í ár. Fylkir einbeitir sér nú að því að reyna að koma sér upp úr fallsæti í þeim tveimur umferðum sem eru eftir í Pepsi Max-deildinni.

Sóknarmönnum Fylkis gekk illa að reka endahnútinn og Orri Hrafn Kjartansson, sá ljómandi flotti leikmaður, klúðraði vítaspyrnu í venjulegum leiktíma. Nafni hans, Orri Sveinn Stefánsson, skallaði boltann svo í eigið net. Tímabil Fylkis í hnotskurn sagði einhver.

Erfiður leikur að dæma og þá er gott að hafa reynslumesta dómara landsins með flautuna.