SKÝRSLAN: Kristall Máni afgreiddi Vestra menn með þrennu
Hvað réði úrslitum?
Víkingar voru einfaldlega með meiri gæði fram á við og komust í betri færi sem þeir kláruðu.
Bestu leikmenn
1. Kristall Máni Ingason (Víkingur)
Skorar þrennu og var potturinn og pannan í sóknarleik Víkinga.
2. Pablo Punyed (Víkingur)
Pablo er alltaf eins og stríðsmaður á miðjunni og var það aftur í dag. Það komst enginn framhjá honum og svo var hann aðal tengill varnar og sóknar í dag.
Atvikið
Þegar Pétur Bjarnason fellur við í teig Víkinga og þeir fara svo upp og skora sekúndum seinna. Ég er handviss um að þetta hafi verið vítaspyrna án þess að hafa séð þetta aftur og hefði verið dæmt svo þá hefði þetta getað orðið allt öðruvísi leikur.
Hvað þýða úrslitin?
Víkingur fer í úrslitin og mæta ÍA þar þann 16. september
Vestri klárar tímabilið sitt með sóma í undanúrslitum bikarsins.
Vondur dagur
Brenton Muhammad markvörður Vestra var í rosalegu veseni með rokið í Vestubænum og tapaði boltanum alltof oft fyrir sína menn með sínum útspörkum. Svo átti hann líkast til að gera betur í marki númer 2 þar sem hann er með hendina í boltanum en hann lekur í gegn og þá varð út um vonir Vestra.
Dómarinn - 3
Ef horft er framhjá þessum tveimur vítaspyrnu atvikum sem Vestri átti mögulega að fá hafði Egill fín tök á leiknum en þessi atvik eru bara það stór að hann fær falleinkun frá mér.