SKÝRSLAN: Samantha lokaði markinu gegn Breiðablik
Hvað réði úrslitum?
Það er ekki hægt að horfa framhjá frammistöðu Samönthu Murphy í marki Keflavíkur en hún var ekkert minna en stórkostleg og að öðrum ólöstuðum megin ástæða þess að stigin þrjú urðu öll eftir í Keflavík. Fórnfýsi leikmanna sem freistuðu þess að henda sér fyrir alla bolta skilaði líka sínu en það sem á markið fór varði Samantha.
Bestu leikmenn
1. Samantha Leshnak Murphy
Sjaldan verið jafn auðvelt val. 12-13 varin skot og víti varið auk þess sem hún greip haug af fyrirgjöfum líka. Skynsöm líka í öllum sínum aðgerðum og er frábær í fótunum sömuleiðis. Hún sjálf hrósaði Sævari Júlíussyni markmannsþjálfara í samtölum eftir leik og ekki annað hægt en að taka undir með henni þar.
2. Kristrún Ýr Holm
Ég gæti tekið margar úr Keflavík hér en fyrirliðinn tekur sitt sæti. Góður talandi og rífur sínar stelpur áfram eins og alvöru valkyrja. Hún er eflaust ekki besti varnarmaður deildarinnar en bætir það upp og vel það með baráttu og vilja.
Atvikið
Get ekki annað en nefnt tvö atvik. Annars vegar trufluð markvarsla Samönthu eftir um 75 mínútur þegar skot úr markteig stefnir upp í samskeytin en á einhvern ótrúlegan hátt ver sú bandaríska. Svo er það ljóðrænt nánast að tryggja sínu liði þrjú stig með því að verja víti á lokaandartökum leiksins.
Hvað þýða úrslitin?
Keflavík tyllir sér á topp deildarinnar með fullt hús stiga líkt og Selfoss. Breiðablik situr í fjórða sæti með þrjú stig.
Vondur dagur
Það er eiginlega hálf ósanngjarnt að tala um að einhver hafi átt vondan dag. Breiðablik var alls ekki að spila illa á neinn hátt. Meira að segja vítaspyrna Natöshu var ekki slæm þó hún hafi verið varin en gefum henni vondan dag fyrir það.
Dómarinn - 7
Vítaspyrnan var réttur dómur frá mér séð svo einfalt var það. Eflaust hægt að tína til eitthvað til en heilt yfir fínn leikur hjá Gunnari.