Þannig fór um sjóferð þá... sigur var það. En þrátt fyrir það sárafátt jákvætt sem hægt er að taka úr þessum leik. Þetta var alls ekki burðug frammistaða. Ekki til útflutnings.

Mikael Anderson með skot yfir markið.

Markvörður San Marínó hefur aðeins átt tvær markvörslur í leiknum...

Uppbótartíminn er að minnsta kosti 4 mínútur.

Stefán Teitur tók við fyrirliðabandinu.

Já ég verð að viðurkenna að ég er spenntur að heyra hvað Kári Árna og félagar segja eftir þennan leik... og hvað menn segja í viðtölunum eftir leik.

Hættuleg fyrirgjöf frá Jasoni Daða sem hefur komið öflugur inn. Andri Lucas tekur flugskalla en nær ekki til boltans.

Það er alveg ljóst að örlítið betri andstæðingur væri klárlega búinn að refsa okkur. Þetta hefur verið mjög dapurt í kvöld.

Fyrirgjöf hjá San Marínó en Atli Barkarson skallar frá. Heimamenn eru að komast í fínar stöður til að geta náð inn jöfnunarmarki.

Jason Daði skýtur framhjá, flaggaður rangstæður. Þetta hefði ekki talið.

San Marínó með hornspyrnu en hún er slök og beint á Valgeir Lunddal.

Alessandro Golinucci með fyrstu marktilraun San Marínó á rammann. Beint á Patrik sem á ekki í nokkrum vandræðum.

San Marínó að eiga fínan kafla hérna núna. Skot af löngu færi langt framhjá núna. En Arnar hlýtur að fara að gera skiptingu. Þetta er alls ekki gott.

VÓ!!! HREINLEGA STÁLHEPPNIR AÐ SAN MARÍNÓ HAFI EKKI JAFNAÐ! Vandræðagangur í vörninni og Patrik misreiknar sig rosalega og fer langt út úr markinu. Skyndilega komast heimamenn í dauðafæri en skjóta í hliðarnetið. Markið var opið. Þarna hefði San Marínó getað jafnað í 1-1!

Afskaplega rólegt yfir þessum leik núna.

Arnar Viðars var í mynd, grafalvarlegur á svip. Virkar ekkert of hrifinn af því sem hann hefur séð. Skil hann vel.

Danilo Ezequiel Rinaldi með fyrirgjöf en enginn í liði heimamanna nær að koma sér í boltann.

Aron Þrándar með sendingu fram en boltinn of fastur fyrir Mikael Egil. Simoncini handsamar knöttinn.

Seinni hálfleikur er farinn af stað - Íslenska liðið er óbreytt.

Kári og Rúrik ekki hrifnir eftir þennan fyrri hálfleik og Rúrik setur spurningamerki við hvort menn væru að ná að gíra sig í þetta verkefni. Kári talar um að ef menn geta ekki gírað sig í landsleik, sérstaklega þegar menn eru að berjast um sæti í liðinu, þá geti þeir alveg eins setið heima.

Ísland einu marki yfir í hálfleik. Vonandi fjölgar íslensku færunum og mörkunum frekar í seinni hálfleik.

Hættulegur bolti inn á teiginn. Mikael Egill nær ekki til boltans. Nafni hans átti sendinguna.

Smá tölfræði: Með boltann: 32% - 68% Marktilraunir: 1-8

"Það vantar herslumuninn í sóknaraðgerðir okkar manna hér," segir Gunnar Ormslev sem lýsir leiknum á Viaplay.

Aftur finnur Albert sendingu á Mikael Anderson sem á skot en Simoncini lokar á hann og ver.

Albert Guðmundsson í afskaplega góðu færi eftir lipran undirbúning frá Mikael Anderson en skalli Alberts framhjá.

Danilo Ezequiel Rinaldi með skottilraun af löngu færi þar sem Patrik var kominn út úr markinu en skotið vel framhjá.

Stefán Teitur með fína skottilraun frá vítateigboganum, rétt yfir markið.

Hornspyrna. Ari Leifsson með skalla framhjá.

Valgeir Lunddal með fyrirgjöf sem Mirko Palazzi kemur í burtu.

VARIÐ Í STÖNGINA! Albert Guðmundsson fær pláss og tíma og sækir fram, rennir boltanum til vinstri á Mikael Anderson sem á skot sem Simoncini ver í stöngina!

Rautt spjald á markvarðaþjálfara San Marínó! Var eitthvað að láta í sér heyra á hliðarlínunni og Michael Fabbri dómari lyftir einfaldlega upp rauða spjaldinu!

Atli Barkarson með fyrirgjöf en hittir boltann afleitlega og hann flýgur afturfyrir.

San Marínó fær sína fyrstu hornspyrnu í leiknum. Matteo Vitaioli sem tekur spyrnuna stutt, fær boltann aftur en fyrirgjöf hans flýgur afturfyrir.

Ísland miklu meira með boltann en við höfum enn ekki fengið almennilegt marktækifæri í þennan leik.

Aðeins rúmlega 300 miðar seldir á þennan leik í San Marínó.

Andrea Gandoni með fyrirgjöf frá vinstri sem Patrik á ekki í nokkrum vandræðum með að grípa.

Mikael Anderson með skottilraun en varnarmaður San Marínó náði að kasta sér fyrir.

Heimamenn hófu leikinn. Fáum við markasúpu frá okkar liði í kvöld? Uppstilling Íslands: Patrik Valgeir - Brynjar - Ari - Atli Stefán - Aron (f) - Albert Mikael - Sveinn Aron - Mikael

Verið að leika þjóðsöngvana. Íslenska liðið í hvítum treyjum og hvítum stuttbuxum í leiknum í kvöld. Allt að verða klárt fyrir fyrsta landsleik Íslands og San Marínó í sögunni.

Arnar Viðarsson þjálfari í viðtali við Viaplay: "Ég vil fá orku, sigurvilja og aga frá liðinu í dag. Hlaupagetu. Þetta eru ellefu breytingar frá leiknum gegn Albaníu en allir leikmenn í hópnum vita hvaða hlutverki þeir gegna og hverju við ætlumst til af þeim. Leikurinn í dag er mikilvægur en svo byrjum við að undirbúa leikinn gegn Ísrael."

Allir búast við stórum sigri hjá Íslandi gegn neðsta liði heimslistans. "Stórslys" ef þessi leikur myndi tapast segir Kári Árnason í settinu hjá Viaplay.

Patrik Sigurður Gunnarsson er í markinu og leikur sinn fyrsta A-landsleik. Patrik er 21 árs gamall og leikur fyrir Viking í Noregi.

Aron Þrándar með fyrirliðabandið Byrjunarlið Íslands er komið inn. Arnar Viðars gerir alls ellefu breytingar á byrjunarliðinu frá 1-1 jafnteflinu gegn Albaníu í Þjóðadeildinni á mánudaginn. Aron Elís Þrándarson er með fyrirliðabandið og Albert Guðmundsson er meðal byrjunarliðsmanna.

Ég var að renna yfir leikmannahóp San Marínó. Landsleikjahæstur er sóknarmaðurinn Matteo Vitaioli sem spilar fyrir Tropical Coriano. Hann hefur spilað 74 leiki og skorað eitt mark. Reyndar er enginn í hópnum hjá San Marínó sem hefur skorað meira en eitt landsliðsmark.

Spilað verður á þjóðarleikvangi San Marínó í Serravalle. Leikvangur sem tekur 6.664 en í San Marínó búa alls tæplega 34 þúsund íbúar.

Albert Guðmundsson hefur verið mikið í umræðunni eftir að hann var ónotaður varamaður í jafnteflinu gegn Albaníu á Laugardalsvelli. Hann virkaði þó léttur, ljúfur og kátur á æfingu í San Marínó í gær.

Það er reynslumikill ítalskur dómari sem dæmir, Michael Fabbri sem hefur dæmt fjölmarga leiki í efstu deild á Ítalíu.

Lélegasta landslið heims Ísland og San Marínó hafa ekki mæst áður í A-landsliðum karla en San Marínó er í 211. sæti á styrkleikalista FIFA, neðsta sæti. Talað hefur verið um San Marínó sem lélegasta landslið í fótboltasögunni en liðið hefur aðeins einu sinni unnið opinberan leik, það var 1-0 gegn Liechtenstein 2004. Liðið hefur fengið á sig 4,2 mörk að meðaltali í leik. Leikur San Marínó og Íslands kemur í stað leiks íslenska liðsins við Rússland í B-deild Þjóðadeildar UEFA, sem fara átti fram á morgun.

Nokkrar breytingar hafa verið gerðar á leikmannahópi Íslands fyrir þennan leik. Birkir Bjarnason, Hörður Björgvin Magnússon og Alfons Sampsted fara ekki með liðinu til San Marínó og Bjarki Steinn Bjarkason var með U21 landsliðinu í gær. Inn í hópinn fyrir leikinn við San Marínó koma Jason Daði Svanþórsson, Damir Muminovic og Höskuldur Gunnlaugsson úr Breiðabliki, og Júlíus Magnússon úr Víkingi.

Góðan og gleðilegan daginn, Það er komið að þriðja leik Íslands af fjórum í þessum landsleikjaglugga, vináttuleik á útivelli gegn San Marínó sem verður í beinni útsendingu á Viaplay. Næsta mánudag spilar íslenska liðið seinni leik sinn gegn Ísrael í Þjóðadeild UEFA og verður hann á Laugardalsvelli klukkan 18:45.