SKÝRSLAN: Vinnusigur Keflavíkur á Stjörnunni
Hvað réði úrslitum?
Vörn og markvarsla réði úrslitum í bland við færanýtingu Stjörnunar. Þær fengu alveg færin en inn vildi boltinn ekki hvort sem það var varnarmaður eða Samantha í marki Keflavíkur sem stóð í vegi fyrir þeim.
Bestu leikmenn
1. Samantha Leshnak Murphy
Öryggið uppmálað í búrinu. Varði það sem á markið kom og greip inn í mýmargar fyrirgjafir. Frábær leikur sem hún sýndi stoltri móður sinni sem er í heimsókn á landinu og sat í stúkunni og fylgdist með.
2. Elín Helena Karlsdóttir
Skórnir hennar Sveindísar skora alltaf í Keflavík en Gunnar þjálfari Keflavíkur talaði um það eftir leik að Elín hafi verið í skóm af henni. Annars átti Elín góðan leik og gerði markið sem réði úrslitum.
Atvikið
Ef ekki markið þá varslan eftir 72 mínútur þegar Samantha varði skalla úr teignum eftir horn af stuttu færi með viðbragsvörslu. Þegar hún er á sínum besta degi er illmögulegt að setja boltann í netið framhjá henni.
Hvað þýða úrslitin?
Keflavík hoppar uppfyrir Þór/KA í sjöunda sæti deildarinnar með 10 stig, Stjarnan fellur niður í það fjórða með 16 stig og missir ÍBV og Breiðablik uppfyrir sig í töflunni.
Vondur dagur
Sóknarlína Stjörnunar, verkefnið er að skora mörk en þegar fjölmörg ágæt marktækifæri fara forgörðum telst það vondur dagur.
Dómarinn - 7
Fínasti leikur, hélt sinni línu vel og dæmdi með ágætum. Eina sem ég set spurningamerki við er lengd uppbótartímans sem var farinn að telja á sjöundu mínútu þegar flautað var af. En ég minnist þess ekki að svo mikið hafi verið um tafir í seinni hálfleik.