SKÝRSLAN: Flugeldasýning er Víkingur vann sinn fyrsta sigur í Evrópukeppninni
Hvað réði úrslitum?
Víkingar voru einfaldlega miklu, miklu, miklu betra liðið á vellinum í kvöld.
Bestu leikmenn
1. Kristall Máni Ingason
Tók framúr Pablo Punyed á listanum yfir bestu leikmenn vallarins þegar leið á leikinn. Var góður í fyrri hálfleik og lét þreytta leikmenn Levadia heldur betur hafa fyrir sér í seinni hálfleik. Mark, stoðsending og átti virkan þátt í öðrum mörkum Víkings.
2. Pablo Punyed
Reynsla, yfirvegun og ,,swag" - Pablo blómstraði í kvöld og það var ekki að sjá að hann væri búinn að vera glíma við meiðsli. Stjórnaði allri umferð á miðjunni hjá Víkingum og átti þátt í mörkum liðsins.
Atvikið
Þriðja mark Víkings undir lok fyrri hálfleiks gerði útum vonir gestanna. Fyrsta mark Halldórs Smára í Evrópukeppni og fyrsta mark hans fyrir Víking í mótsleik frá því árið 2011... síðan var smá handarlykt af því sem gerir markið ennþá sætara.
Hvað þýða úrslitin?
Víkingur mætir Inter Escaldes, meistaraliði frá Andorra í úrslitaleik um sæti í forkeppni Meistaradeildarinnar á föstudaginn í Víkinni. Sigurvegarnir úr þeim leik mæta sænska stórliðinu, Malmö.
Vondur dagur
Levadia Tallinn. Punktur basta, bannað að breyta.
Dómarinn - 8
Pólverjinn var ekki í vandræðum með gang mála í kvöld.