SKÝRSLAN: Ekki dagur markvarðanna í blíðunni í Garðabæ
Hvað réði úrslitum?
Þetta voru tvö hörkulið að mætast. Víkingar stjórnuðu ferðinni og fengu fleiri færi, en Stjarnan sýndi karakter og gafst ekki upp. Stjörnumenn nýttu þau færi sem þeir fengu vel og réði það því að þeir fengu eitt stig úr þessum leik. Víkingar voru heilt yfir betri en þeim var refsað fyrir að vera klaufar.
Bestu leikmenn
1. Viktor Örlygur Andrason (Víkingur)
Skilaði sínu á miðsvæðinu. Lagði líka upp bæði mörkin með flottum hornspyrnum. Var óheppinn að skora ekki.
2. Eggert Aron Guðmundsson (Stjarnan)
Var að spila í stöðu hægri bakvarðar en það er staða sem hann hefur ekki leyst oft. Gerði virkilega vel í dag, bæði varnarlega og sóknarlega.
Atvikið
Vítaspyrnan sem Stjarnan fékk. Klaufalegt hjá Ingvari og úr því kemur jöfnunarmarkið. Víkingar fengu líka vítaspyrnu í leiknum og má færa sterk rök fyrir því að það hafi verið stærsta atvik leiksins. Erlingur Agnarsson fékk tækifæri til að koma Víkingum í 2-0 en skaut hátt yfir.
Hvað þýða úrslitin?
Bæði lið eru svekkt með að fá einungis eitt stig. Víkingar eru sex stigum frá toppliði Breiðabliks og Stjarnan er þremur stigum á eftir KA sem er í þriðja sæti.
Vondur dagur
Markverðirnir báðir áttu ekki sinn besta dag. Þeir gáfu báðir vítaspyrnu. Haraldur átti þá mögulega að gera betur í báðum mörkunum sem Víkingar skoruðu. Nikolaj Hansen átti ekki sinn besta dag þrátt fyrir að skora og var hann mjög klaufskur oft á tíðum. Þá fær Erlingur Agnarsson 'shout' hérna þar sem hann fékk gult fyrir dýfu og klúðraði víti.
Dómarinn - 8,5
Mér fannst Vilhjálmur dæma leikinn vel. Hann var með góða stjórn og frá mínu sjónarhorni í fréttamannastúkunni voru hann og hans teymi með stóru atriðin á hreinu.