SKÝRSLAN: Keflavík spyrnir sér frá botnliðunum
Hvað réði úrslitum?
Hvað skal segja eftir svona leik? Var það vilji eða meiri ákveðni í leik Keflavíkur? Eða var það ögn meiri heppni þeirra megin? Sennilegast var það sambland af öllu ofangreindu en hvað sem það var er niðurstaðan 3 stig til Keflavíkur.
Bestu leikmenn
1. Amelía Rún Fjeldsted
Tvær stoðsendingar auk þess að eiga skotið/sendinguna sem vítið kemur upp úr. Flottur leikur í heild hjá þessum unga leikmanni sem reyndist liði sínu dýrmætur.
2. Hildur Karítas Gunnarsdóttir
Mark og stoðsending í dag auk þess sem hún barðist vel fyrir sitt lið. Skilaði þó ekki stigum í dag sem er ver og miður en góður leikur engu að síður hjá Hildi.
Atvikið
Eyrún Vala Harðardóttir kom inn á á 53. mínútu leiksins. Um 15 sekúndum eftir að hafa stigið inn á völlinn hafði hún komið í boltanum í netið. Alvöru innkoma það.
Hvað þýða úrslitin?
Keflavík fer í 13 stig í 7.sætinu og eykur bilið í Aftureldingu í 4 stig og slítur sig ögn frá botnliðunum . Aftureldin situr í 9.sæti með 9 stig.
Vondur dagur
Leikmenn mega eiga það að bæði lið áttu heilt yfir bara fínasta leik og erfitt að tala um vondan dag í þeirra hópi. Alexander Aron Davorsson þjálfari Aftureldingar fær þetta á sig í dag. Góður drengur sem á afmæli í dag og þar sem það er aldrei gaman að tapa og hvað þá á afmælinu sínu þá set ég þetta á hann.
Dómarinn - 7
Vítadómurinn líklega réttur og gefum prik fyrir það. Einhverjir ósáttir við framkvæmdina þar en látum það liggja á milli hluta. Hélt sinni línu þokkalega og gerði sitt vel.