SKÝRSLAN: Göngutúr í rennandi blautum garði
Hvað réði úrslitum?
Valur er bara langbesta liðið á landinu þessa stundina. Þær eru löngu búnar að finna taktinn og það er gríðarlega erfitt að stöðva þær. Valur er á toppnum og KR er á botninum, og það sást á leik liðanna í dag. KR átti sín augnablik en náði ekki að nýta þau nægilega vel.
Bestu leikmenn
1. Þórdís Hrönn Sigfúsdóttir (Valur)
Eitt mark og þrjár stoðsendingar. Er búin að vera vaxandi á tímabilinu og er núna í algjöru lykilhlutverki.
2. Ásdís Karen Halldórsdóttir (Valur)
Var í landsliðshópnum og hefur bara sýnt það með frammistöðu sinni í sumar að þar á hún heima. Mist Edvardsdóttir gerði líka tilkall, en það var ekki mjög mikið að gera hjá henni í vörninni í þessum leik.
Atvikið
Fyrsta markið sem Mist Edvardsdóttir skoraði eftir ótrúlegt hlaup er eftirminnilegt. Svo gerði Þórdís Elva geggjað mark sem hlýtur að vera eitt af mörkum tímabilsins.
Hvað þýða úrslitin?
Þetta var ansi góður dagur fyrir Val, en Breiðablik gerði jafntefli í Vestmannaeyjum. Því er Valur með sex stiga forskot þegar fjórar umferðir eru eftir. KR er á botninum, sex stigum frá öruggu sæti, en þær halda enn í vonina.
Vondur dagur
Rasamee átti erfitt uppdráttar í byrjun. Hún er með mikil gæði en fann sig ekki. Það er líklega ósanngjarnt að taka einhvern einn samt út úr KR-liðinu. Þegar þú tapar 6-0 þá er líklega hægt að segja að allir hafi átt mjög vondan dag í tapliðinu.
Dómarinn - 7
Heilt yfir vel dæmdur leikur hjá Jóhanni. Ég get ekki metið rangstöðumörkin hjá KR úr þeirri stöðu sem ég var á vellinum. Það er kannski hægt að skoða það aftur, en sigurinn var mjög sanngjarn samt sem áður og það hefði örugglega ekki breytt öllu þó KR hefði náð inn einu eða tveimur mörkum - þannig var allavega tilfinningin í þessum leik.