SKÝRSLAN: Baráttusigur hjá ÍBV - Tvö atvik sem FH-ingar horfa væntanlega í
Hvað réði úrslitum?
Það var ekkert rosalega mikið um dauðafæri í þessum leik. ÍBV tók sína sénsa virkilega vel og Atli Gunnar hafði ekkert alltof mikið að gera. Vindurinn hafði talsverð áhrif en ætli það stærsta sem réði úrslitunum í þessum leik hafi ekki verið dauðafærið sem fór forgörðum hjá FH.
Bestu leikmenn
1. Eiður Aron Sigurbjörnsson
Fyrirliðinn frábær, traustur til baka og skoraði sigurmarkið.
2. Telmo Castanheira
Var sérstaklega góður í upphafi leiks, skoraði glæsilegt mark og var svo duglegur að skalla í burtu fyrirgjafir.
Atvikið
Dauðafærið sem Matthías Vilhjálmsson fékk í seinni hálfleik til að jafna leikinn. Boltinn datt fyrir framan hann inn á markteignum en tilraun hans fór beint á Guðjón Orra í markinu.
Hvað þýða úrslitin?
FH er áfram í fallsæti og ÍBV færist fjórum stigum frá þeim. FH og Leiknir mætast í alvöru fallbaráttuslag á sunnudag, 10. og 11. sætið mætast og eitt stig skilur liðin að.
Vondur dagur
Af þeim sem byrjuðu átti Steven Lennon ekki góðan dag heilt yfir. Fékk eitt ákjósanlegt færi sem hann náði ekki að nýta og sást fyrir utan það lítið. Það er af sem áður var hjá Lennon. Davíð Snær mun svo væntanlega naga sig í handarbökin að hafa ekki náð að hreinsa boltann í burtu í sigurmarkinu.
Dómarinn - 7
Lítið út á hann að setja, spurning með hendi á Alta Hrafn í fyrsta markinu, annars flott frammistaða.