SKÝRSLAN: Fjórföld skipting Arnars skilaði sigri
Hvað réði úrslitum?
Ferskir fætur og sú ákvörðun Arnars að hrista upp í hlutunum með fjórfaldri skiptingu. Allir fjórir leikmenn sem komu inn á skoruðu mark, áttu stoðsendingu eða aðra lykilsendingu sem skilaði marki á þessu lokakafla leiksins. Vel heppnuð skipting það. Að öðru leyti virtist orka Valsmanna búinn í restina og Víkingar gengu á lagið.
Bestu leikmenn
1. Danijel Dejan Djuric
Ef ég gæti myndi ég setja alla fjóra varamenn Víkings hér í þennan dálk því þeir breyttu svo sannarlega gangi leiksins. En Dani var með eitthvað extra, einhverja áræðni og kraft sem smitaði útfrá sér inn í liðið og skilaði sigrinum. Þess utan skoraði hann tvö mörk og átti frábærar mínútur á þessum lokakafla.
2. Aron Jóhannsson
Algjörlega frábær í fyrri hálfleik og réðu Víkingar ekkert við hann. hefði klárlega verið efstur á blaði ef Valsmenn hefðu tekið stigin þrjú en heldur fór að draga af honum er líða fór á seinni hálfleikinn og örlaði fyrir pirring hjá honum þegar blása fór á móti.
Atvikið
Skiptingin að sjálfsögðu. Snýr leiknum á hvolf á endanum og gjörbreytti allri dýnamík á vellinum. Frábær ákvörðun hjá Arnari að fara all in sem svo sannarlega skilaði sér.
Hvað þýða úrslitin?
Þau þýða það að Víkingar fara á ný uppfyrir KA á markatölu í annað sætið og tryggir um leið KA sæti í Evrópu að ári þar sem Valsmenn geta ekki lengur endað ofar en 4.sæti þar sem þeir sitja nú.
Vondur dagur
Eftir 65 mínútur var ég byrjaður að hugsa textann sem ég ætlaði að skrifa um Oliver Ekroth sem átti ekki sinn besta dag í dag en liðsfélagar hans björguðu honum þar . En vondan dag fær liðsandi Vals þar sem liðið hrundi strax og Víkingar loks blésu á móti. Eftir erfitt tímabil er Evrópa endanlega úr sögunni og menn geta farið að huga að uppbyggingu fyrir næsta tímabil á fullu.
Dómarinn - 7
Fínasti leikur hjá Sigurði Hirti heilt yfir. Spurning hvort að Valsmenn hafi átt að fá aukaspyrnu í aðdraganda jöfnunarmarks Víkinga en Sigurður hafði sleppt sambærilegum atvikum áður í leiknum svo ég læt það liggja á milli hluta.