Martröð í Senica. Viðtöl koma inn á síðuna seinna í kvöld. Fylgist með því!

Portúgal er að vinna 4-0 sigur á Liechtenstein á meðan Slóvakía og Lúxemborg gerðu markalaust jafntefli í okkar riðli. Við verðum á botninum ásamt Liechtenstein eftir fyrstu umferð, en við mætum þeim einmitt næst á sunnudaginn.

Jóhann Berg með gott skot fyrir utan teig en Sehic ver í horn.

Það má minnast á að það vantar þrjár helstu stjörnurnar í lið Bosníu í dag.

Mikael Neville með fínt hlaup inn á teignum en tveir Bosníumenn henda sér fyrir. Þetta segir mikið um muninn á liðunum. Þeir voru tveir sem hentu sér fyrir þessa skottilraun.

Mjög svo þægilegur dagur á skrifstofunni fyrir Bosníu. Ísland lítið náð að ógna í seinni hálfleik.

Jóhann Berg með aukaspyrnu inn á teiginn, en Sehic kemur út og blakar boltanum út.

Hákon með skalla að marki og Sehic tekur alvöru sjónvarpsvörslu. Ísland fær hornspyrnu. Hættulegur bolti inn á teiginn og Mikael Egill á skot sem fer af varnarmanni og upp í loft. Ísland fær aðra hornspyrnu.

Það er alvöru stemning á vellinum, skiljanlega.

Mikael Anderson gerir mjög vel og nær fyrirgjöf sem ratar beint á hausinn á Alfreð. Hann virtist ekki alveg búast við þessu og boltinn fer fram hjá.

Þessi leikur er svolítið bara að fjara út. Mjög lítið að gerast og okkar menn eru ekkert líklegir til að skora.

Jóhann Berg með skot að marki en það er auðvelt fyrir Sehic.

Svo sannarlega frammistaða til að skammast sín fyrir hjá okkar mönnum. Game over.

Hákon vinnur hornspyrnu. Jóhann Berg tekur hana. Hættulegur bolti en Ahmedhodzic er fyrstur á boltann. Ekkert óvænt þar.

Það hljóta að fara að koma skiptingar!

Sehic, markvörður Bosníu, gerir skelfileg mistök. Hann rennur og Hákon Arnar er kominn í dauðafæri. Hákon dettur hins vegar á ögurstundu og færið rennur út í standinn. Þetta var okkar langbesta færi í leiknum og við fengum það á silfurfati.

Þetta er farið að rúlla af stað. Þetta var dapur fyrri hálfleikur en möguleiki til að snúa þessu við. Við þurfum að byrja seinni af krafti! Engar breytingar í hálfleik!

Vont, mjög vont.

Þetta minnir svolítið á leikinn gegn Armeníu í síðasta undankeppni þar sem við töpuðum 2-0. Þetta er mögulega aðeins verra.

Spurning hvort við náum að halda 2-0 stöðunni í hálfleik. Bosníumenn vildu fá víti þarna. Þriðja markið liggur í loftinu. Það er alltaf hætta þegar þeir komast nálægt teignum.

Rúnar Alex búinn að vera besti leikmaður íslenska liðsins og það segir mikið. Aðrir verið mjög slakir.

Gazibegovic hótar þriðja markinu. Fær að leika sér með boltann fyrir utan teig og svo skot sem Rúnar Alex nær að verja.

Við erum aðeins að vakna.

Daníel Leó með gullsendingu upp á Arnór Sig - mjög beinskeytt - og Skagamaðurinn leggur hann fyrir, en Alfreð nær ekki að pota boltanum yfir línuna. Þetta var besta færi Ísland í leiknum til þessa.

Jón Dagur með bolta fyrir og Jóhann Berg nær að koma aðeins við hann áður en boltinn fer rétt fram hjá. Betra frá Íslandi en það þurfti nú ekki mikið til.

Við erum í alls konar með Amar Dedic, leikmann Salzburg í Austurríki. Hann á fyrirgjöf og Sanicanin nær að skalla að marki. Rúnar blakar boltanum yfir markið. Dzeko er ekki með, en þeir eru samt sem áður að skapa mikla hættu í teignum.

Íslendingar hafa ekki enn skapað sér almennilegt færi. Bosníumenn eru líklegri til að bæta við öðru markinu.

Hafliði Breiðfjörð er á vellinum vopnaður myndavélinni.

Bosnía fær hornspyrnu og Ahmedhodzic nær skallanum en hann fer yfir markið.

Alfreð með fasta fyrirgjöf sem fer á viðkvæmt svæði hjá Tahirovic. Fast var þetta og maður getur ekki annað en vorkennt varnarmanni Bosníu.

Bosníumenn halda áfram að sækja á okkur. Við erum vankaðir eftir þetta mark.

Loftgæðin hérna í fréttamannastúkunni ekki mikil, bosnískir kollegar okkar með sígaretturnar á lofti og hér rétt við völlinn er risastór stálverksmiðja sem rýkur stanslaust úr. Stemningin meðal áhorfenda hinsvegar framúrskarandi, stúkurnar að kallast á og menn í miklu stuði.

Það eru svo sannarlega áhyggjumerki á varnarleik íslenska liðsins. Við vorum þrír á tvo í teignum en samt nær Prevljak skallanum.

Davíð Kristján tapar skalla einvíginu. Stórhættulegur bolti inn á teiginn. Daníel Leó missir af boltanum og Prevljak á stórhættulegan skalla sem Rúnar Alex nær að verja. Þarna vorum við heppnir að Dzeko var ekki í teignum. Rúnar Alex er að eiga mjög góðan leik í markinu.

Langt innkast frá Herði inn á teiginn skapar mikinn usla. Daníel Leó vinnur fyrsta boltann og svo er Alfreð í boltanum, en Bosníumenn koma honum í burtu á endanum.

Ísland á hornspyrnu sem Jóhann Berg tekur. Smá darraðadans en engin hætta.

Leikurinn er stopp á meðan hugað er að Rade Krunic, miðjumanni AC Milan. Hann fékk högg á andlitið í sókn Bosníu rétt áðan.

Demirovic allt í einu sloppinn í gegn en Rúnar Alex mætir út á móti og lokar vel. Bosníumenn í stórgóðri stöðu en ná ekki að skora. Heimamenn að fara auðveldlega í gegnum miðjuna.

Fyrsta marktilraun Bosníu. Hadziahmetovic í þröngu færi sem er auðvelt viðureignar fyrir Rúnar Alex.

Jóhann Berg með sendinguna fyrir markið úr aukaspyrnunni og Guðlaugur Victor nær til boltans en hann endar í höndunum á Sehic, markverði Bosníu. Þetta var fínasta aukaspyrna!

Við pressum vel, vinnum boltann hátt á vellinum og fáum aukaspyrnu á góðum stað þegar brotið er á Jóhanni Berg.

Heimamenn eru fljótir að opna íslenska liðið og eru í mjög álitlegri sókn. Daníel Leó gerir hins vegar vel í að ná til boltans þegar Bosníumenn voru komnir inn á teiginn.

Vegferð Íslands í undankeppni EM 2024 er hafin. Mun hún enda í Þýskalandi næsta sumar? Það er lykilatriði að byrja vel.

Okkar þjóðsöngur að baki. Strákarnir okkar sungu hann gullfallega.

Klappað fyrir Edin Dzeko sem labbar yfir völlinn, í gallabuxum og hvítum íþróttaskóm. Hann er ekki að fara að spila í kvöld.

Arnar Þór Viðarsson, landsliðsþjálfari, var í viðtali við Viaplay fyrir leik. Hann býst við erfiðum leik á erfiðum útivelli. Gömlu klisjurnar. Hann segir að grasið á vellinum líti betur út en fyrir mánuði síðan.

Baulað hressilega á íslenska liðið sem gengur til búningsklefa eftir upphitun. Óblíðar móttökur sem okkar menn eru að fá.

Við hlið mér í fréttamannastúkunni situr Jóhann Ingi Hafþórsson á Morgunblaðinu. Jói var nú áberandi í Tólfunni á sínum tíma og gekk undir nafninu "Týnda tólfan". Hann spáir 1-1 jafntefli.

Stefán Teitur og Mikael Anderson hita upp með byrjunarliðinu. Spurning hvort einhver sé tæpur eða þeir hreinlega hugsaðir sem fyrstu varamenn inn?

Bæði lið eru mætt í upphitun. Bosníumenn eru í albláum treyjum svo við verðum alhvítir í þessum leik.

Leikmenn Bosníu eru mættir út í upphitun. Dzeko er ekki sjáanlegur meðal varamannana sem eru að hita upp! Bosnía á mikilvægan leik gegn Slóvakíu á sunnudag, spurning hvort þeir þori að taka einhverja áhættu með hann?

Einhverjar sögusagnir um að Dzeko hafi fengið sprautur við bakverkjum í morgun.

Risafréttir. Edin Dzeko byrjar á bekknum hjá heima. Vægast sagt áhugavert. Hlýtur að vera að glíma við einhver meiðsli!

Það var umræða um það að Guðlaugur Victor Pálsson færi í miðvörðinn eftir meiðsli Sverris, en hann byrjar í hægri bakverði í þessum leik. Daníel Leó Grétarsson kemur inn í miðvörðinn og leikur þar við hlið Harðar Björgvins Magnússonar. Arnór Ingvi Traustason, leikmaður Norrköping, kemur inn á miðjuna og verður þar fyrir aftan Jóhann Berg Guðmundsson, fyrirliða, og Hákon Arnar Haraldsson, mest spennandi leikmann liðsins.

Íslenska landsliðið er búið að taka smá göngutúr um völlinn og skoða aðstæður. Arnór Ingvi Traustason tók sér stöðu rétt fyrir utan miðjubogann. Sagan segir að hann verði djúpur á miðju, Guðlaugur Victor hægri bakvörður og Daníel Leó í miðverði. Það ætti að fást staðfest eftir örfáar mínútur, þegar byrjunarliðin verða opinberuð!

Fékk Magnús Val Böðvarsson, vallarstjóra KR-vallar, til að meta völlinn í Zenica útfrá þessari mynd sem ég var að taka. „Fínt fyrir skamman tíma til undirbúnings en maður sér það ekki almennilega fyrr en maður sér boltann rúlla. En sýnist menn hafa komist vel frá sínu," segir Maggi.

Sjáðu fleiri myndir hérna

Við hverju má búast? „Þetta verður erfiður leikur gegn liði sem er svipað af styrkleika og við. Ég held að heimamenn verði meira með boltann en við verðum þéttir fyrir og beitum skyndisóknum," segir Þorlákur. „Í fyrsta leik í riðli þá er mikilvægt að spennustigið sé rétt, það er langt síðan að liðið spilaði leik sem hafði mikla þýðingu. Ég held að einfalt leikplan og það að menn fari eftir því sé góð uppskrift líkt og þegar okkur hefur gengið vel í gegnum tíðina. Eins leiðinlegt og það hljómar þá held ég að liðið sem geri færri mistök taki þennan leik."

„Ég held að þetta verði lokaður leikur, gríðarleg barátta og kannski ekkert augnakonfekt en að Ísland muni vera meira með boltann og vinni leikinn 2-1," segir Einar. „Lykilinn að góðum úrslitum er agaður og þéttur varnarleikur. Það er sérstaklega mikilvægt þegar að skörð hafa verið hoggin í hrygginn á liðinu. Að pressumómentin verði vel valin, samrýmd og efektív og að við höfum betur í föstum leikatriðum bæði varnar- og sóknarlega. Þetta er týpískur leikur sem ræðst á föstum leikatriðum."

Einar Guðnason, fyrrum aðstoðarþjálfari Víkings Kröfurnar sem við eigum að gera fyrir þennan riðil er annað sætið. Það finnst mér raunhæft markmið sem við ættum allan tímann að stefna á. Ingólfur Sigurðsson, yngri flokka þjálfari og sérfræðingur Að fara þráðbeint upp úr honum. Arnar Þór er búinn að vera með liðið í uppbyggingu í þrjú ár og nú er kominn tími til að sækja úrslit. Allt annað en að minnsta kosti fjögur stig í þessum glugga er óásættanlegt. Óðinn Svan Óðinsson, íþróttafréttamaður á RÚV Allt annað en annað sætið í þessum riðli er skandall. Runólfur Trausti Þórhallsson, markvarðaþjálfari og íþróttafréttamaður Sé ég ekki af hverju við ættum ekki að gera kröfu á að vera berjast um annað sætið í þessum riðli. Hann er galopinn og ef við tökum Portúgal úr myndinni eru þetta allt þjóðir sem við getum unnið bæði heima og að heiman á góðum degi. Þorlákur Árnason, þjálfari Þórs: Ég held að það sé raunhæft að við séum að keppa um að ná öðru sætinu í riðlinum. Portúgalar eru klárlega með besta liðið en það er lítill munur á okkur, Bosníumönnum og Slóvökum. Þetta mun velta mest á því hvort að leikmenn eins og Alfreð og Jóhann Berg komi til með að nýtast liðinu líkt og þeir gerðu fyrir nokkrum árum. Sjá einnig: Álitsgjafar skoða verkefnið

Búist er við mikilli stemningu á landsleik Bosníu/Hersegóvínu og Íslands í kvöld. Fjallað hefur verið um að heimamenn séu í einhvers konar heimaleikjabanni og að hluta stúkunnar verði lokað. Nú hefur hinsvegar komið í ljós að Bosníumenn sleppa við heimaleikjabann þó þeir séu á seinasta séns, vegna óláta áhorfenda. Þeir eru á skilorði í tvö ár. Reiknað er með fullum velli og rosalegri stemningu á Bilino polje leikvangnum í Zenica í kvöld en hann tekur um 15 þúsund manns. Ástæðan fyrir því að leikurinn fer fram í Zenica er sú að í borginni er hvað mest stemning fyrir landsliðinu og andrúmsloftið getur verið rosalegt. „Þeir eru að spila í Zenica sem er völlur þar sem er stuð og stemning. Ég veit ekki hvernig ungt lið Íslands mun höndla það þegar það eru tugir þúsunda að öskra og æpa," sagði Salih Heimir Porca við RÚV.

Edin Dzeko, landsliðsfyrirliði Bosníu/Hersegóvínu, tjáði sig um komandi leik gegn Íslandi á fréttamannafundi í Zenica í gær. Dzeko er skærasta stjarna liðs Bosníu og dýrkaður og dáður í landinu. „Allir leikmenn þurfa að taka þessum leik eins alvarlega og hægt er, það er eina leiðin til sigurs. Þetta verður ekki auðveldur leikur, það verður mikið um einvígi og kapphlaup," segir Dzeko. „Við erum með gott lið og ákveðna styrkleika, við þurfum að sýna gæði okkar inni á vellinum. Það er mikilvægt að byrja undankeppnina á góðum úrslitum." Dzeko spilar með Inter en hann varð á dögunum 37 ára gamall. „Sú staðreynd að ég er hér í landsliðinu 37 ára sýnir hversu miklu máli þetta skiptir mig. Ég yrði ánægðastur allra ef við tryggjum okkur í fyrsta sinn í lokakeppni EM," segir Dzeko.

„Við erum að mínu mati með rosalega sterkan hóp, góða leikmenn. Það eru nánast allir að spila mikið og nánast allir að spila mjög vel," sagði Arnar Þór Viðarsson landsliðsþjálfari á fréttamannafundi í Zenica í gær. „Við höfum verið að horfa til þess undanfarnar vikur hverjir eru í sínu besta leikformi." Arnar hefur aldrei verið með jafn öflugan hóp í höndunum og nú, síðan hann tók við landsliðsþjálfarastarfinu. „Ég get alveg tekið undir það. Það var erfiðast fyrir mig og okkur að velja þennan hóp. Það eru leikmenn sem eru í hópnum en ættu það fyllilega skilið að vera í honum. Við erum á góðum stað akkúrat núna." Sérfræðingar tala um jafntefli sem mjög góð úrslit í leiknum í kvöld. Þegar Arnar var spurður að því hver væri ásættanleg uppskera úr þessum glugga vildi hann horfa á þetta í víðara samhengi. „Við horfum á þetta verkefni sem 2023. Það fór ferli af stað fyrir tveimur árum, þegar ég var ráðinn í þetta starf. Þá fóru hlutir af stað, við ætluðum að ráðast á HM en það fór eins og það fór. Við þurftum að endurskipuleggja okkur á síðasta ári," sagði Arnar. „Lið eins og Bosnía og Slóvakía telja sig eiga mikla möguleika og við gerum það líka. Við erum með ákveðin markmið um stigafjölda sem við viljum ná í þessari undankeppni og vonandi fáum við sem flest stig í þessari viku." „Getum ekki bara einbeitt okkur að Dzeko“ Stærsta nafnið hjá heimamönnum er fyrirliðinn og sóknarmaðurinn reynslumikli Edin Dzeko sem spilar í dag fyrir Inter. Hversu mikil áhersla er lögð á að reyna að stöðva hann? „Við erum með leikplan og það snýst ekki bara um hann. Hann er þeirra skærasta stjarna en þeir eru með marga góða leikmenn. Þeir eru með leikmenn sem eru að spila á háu 'leveli'. Við getum ekki bara einbeitt okkur að Dzeko, það eru aðrir leikmenn sem eru að fæða hann með sendingum og fyrirgjöfum. Við þurfum líka að stöðva það," segir Arnar. „Það er of seint í rassinn gripið að ætla bara að stoppa hann þegar hann er með boltann."

Um 27% lesenda Fótbolta.net spá því að Ísland fái draumabyrjun í undankeppninni en 50,3% telja hinsvegar að heimamenn vinni. Þetta er niðurstaða könnunar sem verið hefur á forsíðunni.

„Ég er að reyna að ímynda mér að ég sé að fara að spila, bara til að fá tilfinninguna. Ég væri til í að vera á vellinum á morgun og berjast fyrir þremur stigum," segir landsliðsfyrirliðinn Aron Einar Gunnarsson. Hann sat fyrir svörum á fréttamannafundi í gær, þrátt fyrir að taka út leikbann í leiknum í Bosníu. Aron fékk rautt spjald gegn Albaníu í Þjóðadeildinni. „Ég er kominn hingað til að hjálpa til við að undirbúa liðið eins vel og hægt er. Það er svekkjandi að vera ekki með. En ég mæti ferskur í Liechtenstein leikinn, maður reynir að horfa á þetta jákvæðum augum." Aron segir það algjörlega í höndum liðsins að búa til betri stemningu fyrir liðinu hjá íslensku þjóðinni. Til að það takist þurfi að sækja úrslit. „Úrslitin skapa stemningu, við þurfum að ná í úrslitin til að búa til stemningu í kringum okkur aftur. Fá fólk á völlinn aftur. Það er undir okkur komið, hvernig við spilum og hvaða úrslit við náum í. Þetta er alfarið undir okkur komið hvernig framvindan á því verður," segir Aron. „Ég er mjög spenntur fyrir þessum riðli, það eru skemmtileg verkefni í þessu og góðir möguleikar. Ég er virkilega spenntur fyrir þessari undankeppni."

„Portúgal er langsterkasta liðið í riðlinum, það er ekki þar með sagt að ekki sé hægt að ná í úrslit á móti þeim en að öllu eðlilegu eru þeir að fara að vinna þennan riðil. Hitt verður jafnt og mun ráðast á pínulitlum atriðum," segir Jóhannes Karl. „Markmiðið er alveg skýrt hjá hópnum, við ætlum okkur að komast á EM. Það er bara númer eitt, tvö og þrjú. Við ætlum okkur að minnsta kosti að ná öðru sætinu. Leikmönnum og þjálfarateyminu þyrstir í það að ná árangri. Við ætlum okkur að uppskeran verði sú að við komumst á EM." Hann segir að markmiðið sé að ná í að minnsta kosti eitt stig út úr komandi leik í Zenica. „Það yrði frábært að koma vel út úr þessum glugga, sem við ætlum að gera, og fá spennandi leiki hér heima gegn Slóvakíu og Portúgal í vonandi sól og blíðu. Fyrri leikurinn er sautjánda júní og vonandi stemning og fullur Laugardalsvöllur."

„Það er geggjað að undankeppnin sé að byrja, mikilvægir leikir og mikið undir. Liðið er vel gírað og það er ég líka," segir Arnór. „Það eru margir í okkar hóp að spila mikið og spila vel. Það er stór plús fyrir þetta verkefni að við séum með menn í fantaformi." „Ég veit að við erum vel gíraðir og vel stemmdir í þetta. Við höfðum eiginlega allt árið í fyrra til að undirbúa okkur undir þetta. Ég held að liðið gæti ekki verið á betri stað en í dag." „Við förum inn í alla leiki til að vinna þá. Það er ekki spurning. Þetta verður barátta og þolinmæði. Við verðum að vera tilbúnir í það. Við verðum að vera með kassann úti og hafa trú á því sem við erum að gera. Við erum með flottan hóp og við erum í riðli sem gefur okkur góða möguleika. Þetta snýst um að ná í úrslit og það byrjar núna á fimmtudaginn."

Dómari frá Litáen, Donatas Rumsas, verður að störfum í kvöld. Rumsas er 35 ára byggingaverkfræðingur. Dómaratríóið og fjórði dómarinn á vellinum koma allir frá Litáen en hinsvegar verða VAR dómararnir ítalskir. Paolo Valeri er VAR dómari leiksins.

Klukkan 19:45 (20:45 að staðartíma hér í Zenica) leikur Ísland gegn Bosníu/Hersegóvínu, fyrsti leikur okkar manna í undankeppni EM. Á sunnudag er útileikur gegn Liechtenstein. Auk þessara liða eru Portúgal, Slóvakía og Lúxemborg í riðlinum en tvö efstu liðin tryggja sér sæti í lokakeppni EM í Þýskalandi 2024. Möguleikar Íslands eru því nokkuð góðir en fastlega má gera ráð fyrir því að Portúgal vinni riðilinn en hart verði barist um annað sætið.