SKÝRSLAN: KR-ingar tylla sér á toppinn eftir sigur í Keflavík
Hvað réði úrslitum?
KR-ingar voru heilt yfir betri fannst mér, voru sterkari í fyrri hálfleik og komust svo yfir fljótlega í þeim seinni, það var ekki fyrr en þá sem Keflvíkingar rönkuðu við sér og fóru að setja meiri kraft í sóknarleikinn á sama tíma og KR liðið féll aftar.
Bestu leikmenn
1. Simen Kjellevold (KR)
Verð að gefa honum þessa nafnbót fyrir stórkostlegar vörslur þar sem hann bjargaði KR í þrígang, þrátt fyrir yfirhönd KR-inga hefði ekki þurft mikið til að kasta því frá sér.
2. Kennie Chopart (KR)
Kennie var frábær í liði KR, gríðarlega öflugur sóknarlega að venju og á stóran þátt í öðru marki KR-inga, alltaf solid varnarlega í þokkabót, öflugur leiðtogi og fyrirliði KR.
Atvikið
Víti? Mér fannst Sindri Þór eiga að fá vítaspyrnu þegar hann átti góðan sprett inn á teiginn og var að koma sér framhjá að ég held Jakobi Franz, en Helgi Mikael dæmdi ekkert.
Hvað þýða úrslitin?
KR tyllir sér á topp deildarinnar með fjögur stig, stigi meira en Kelfvíkingarnir sem eru með þrjú.
Vondur dagur
Blaðamannaskúrinn hjá Keflvíkingum, er á jarðhæð milli varamannabekkjanna. Fjórði dómarinn stendur allan leikinn fyrir framan skúrinn og ef einhver stendur upp á varamannabekkjum liðanna þá skyggja þeir strax á sjón blaðamanna, fyrir utan það hvað yfirsýnin er vond yfir völlinn fyrir þá sem eru að reyna að fjalla um leikinn. Ég skellti mér yfir í brekkuna í seinni hálfleik og kláraði að textalýsa úr símanum mínum, ópraktískt en var talsvert þægilegra, skora á Reykjanesbæ að bæta úr þessu.
Dómarinn - 5
Heilt yfir mjög flottir fannst mér en að mínu viti átti Keflavík að fá víti og það dregur þá ansi mikið niður, enda hafði það líklegast ágætis áhrif á leikinn. Ef ég hef rangt fyrir mér með vítið má rúna einkunnina upp í 9!