Njarðvík vinnur sinn fyrsta deildarsigur í sumar í uppgjöri nýliða deildarinnar. Erfitt að segja annað en að sigurinn sé sanngjarn.

Skjótum á þrjár til fjórar mínútur í uppbótartíma.

Fátt sem bendir til annars en að stigin þrjú verði eftir hér í Njarðvík í kvöld. Með öll tök á leiknum sem stendur heimamenn.

Rafael í færi eftir sendingu frá Oliver frá hægri en setur boltann í varnarmann sem náði að vinna sig fyrir skotið.

Hinrik í algjöru dauðfæri í teig Njarðvíkur en Blakala leggst og fær boltann í fæturnar. Frábær markvarsla en Hinrik á hreinlega að gera betur þarna.

Bjóst mögulega ekki við boltanum en af stuttu færi.

Þorsteinn Örn með fyrirgjöf frá vinstri sem vindurinn kýs að breyta í skot, Sveinn í allskonar brasi með þetta en eflaust manna fegnastur þegar boltinn dettur á slánna.

Ágúst Karel með skot úr D-boganum fyrir gestina en skotið beint á Blakala.

Þróttarar að sækja í sig veðrið, Sýnist það vera Hinrik sem er að vinna sig í algjört dauðafæri en dvelur of lengi á boltanum. Fer niður í baráttu við varnarmann og vill fá eitthvað fyrir sinn snúð en Twana sér ekkert athugavert.

Gestirnir að vinna sig í hörkufæri en Blakala ver glæsilega, Flaggið á loft í þokkabót

Oumar og Rafel tveir í gegn eftir mistök í öftustu línu Þróttar. Oumar tekur ranga ákvörðun með tíma til að hugsa og setur boltann strax fyrir markið og beint á Svein fer boltinn.

Njarðvíkingar vinna boltann hátt á vellinum, Oliver finnur Rafael á vítateigslínu sem lætur vaða en boltinn smellur í stönginni!

Hornspyrna frá Oumar svífur í fallegum sveig í gegnum teiginn og smellur í þverslánni, Sveinn hafði líklega fingur á þessu bolta og kom sennilega í veg fyrir mark hreinlega.

Verið svona rólegt yfir þessu heilt yfir síðustu mínútur. Boltinn teiga á milli en engin færi til að tala um.

Oliver Kelart í dauðafæri hægra megin í teig Þróttar en boltinn framhjá.

Heimamenn sparka þessu í gang í síðari hálfleik

Þrátt fyrir að sagt hafi verið fyrir leik að útsending frá leiknum færi ekki í loftið er hún nú bara samt í loftinu.

Vandamálin greinilega leyst og því getur fólk ef það kýs svo kveikt á útsendingunni á Youtube.

Leikmenn ganga blautir og vindbarðir til búningsherbergja. Smá pása og kaffi til að ylja sér og svo hefjum við þetta aftur.

+1 Aftur skorar Ágúst Karel en dæmdur brotlegur og það líklega réttilega.

Virkaði nokkuð klár bakhrinding.

Smá kraðak í teig Njarðvíkur eftir hornspyrnu. Heimamenn hreinsa á endanum boltann frá marki.

Frábær boltafærsla hjá Njarðvík sem færir boltann hratt frá vinstri til hægri og sundurspilar vörn Þróttara í ferlinu, Hogg í hörkufæri en skot hans beint á Svein,

Kostiantyn Iaroshenko með ágætis skottilraun af löngu færi. Blakala í vandræðum en nær að slá boltann í horn.

Heimamenn að fá vítaspyrnu, hver braut á hverjum er ómögulegt að sjá hér út um gluggann á boxinu í regninu.

Kári Kristjánsson með tilraun að marki. Laflaust skot og Blakala ekki í vandræðum. Allt í áttina samt.

Fyrir áhugasama þá var flug FI209 frá Kaupmannahöfn rétt í þessu að lenda. Einum og hálfum klukkutíma á eftir áætlun.

Þróttarar geysast upp í skyndisókn, synist það vera Aron Snær sem mundar skotfótinn frá hægra vítateigshorni en boltinn í hliðarnetið.

Gestirnir sækja, uppskera hornspyrnu.

Njarðvík spilar út, tapar boltanum. Löng spyrna fram og markspyrna frá marki Njarðvíkur.

Leikurinn í hnotskurn þetta fyrsta korter þó Þ?óttarar hafi vissulega átt sín upphlaup.

Rafael með boltann úti til hægri, setur hann fyrir markið en Diouck og Hogg ná hvorugir að leggja boltann fyrir sig, dæmdir brotlegir í kjölfarið.

Kenneth Hogg með hættulegan bolta fyrir markið frá hægri en Þ?óttarar koma boltanum frá í horn. Ekkert kemur upp úr horninu.

Heimamenn haldið betur í boltann hér í upphafi.

Það er bölvað rok satt að segja. Ef menn ætla eitthvað að reyna að lyfta boltanum hér í dag er það ekki líklegt til árangurs.

Gestirnir sparka þessu af stað.

Hlaðvarpsstjórnandinn, fréttaritari Fótbolta.net en fyrst og framst gallharði Njarðvíkingurinn Stefán Marteinn Ólafsson á ekki heimangengt í kvöld þar sem hann er á flakki. Hann þarf þó ekki að örvænta að missa af leik kvöldsins því eins og allir aðrir leikir Lengjudeildarinnar er þessi leikur að sjálfsögðu í þráðbeinni á Youtube.

Edit: Vegna netvandamála á Rafholtsvellinum getur Stefán byrjað að örvænta núna því beinu streymi frá leiknum hefur verið aflýst. Smá skellur það.

Grindvíkingurinn og bjartasta von Íslands í orkumálum framtíðar Gunnar Þorsteinsson spáði fyrir okkur frá einhverjum Starbucks staðnum á Manhattan en hann elur manninn í New York sem stendur. Hann hafði mjög skýra sýn á hvaða leikmenn myndu taka sviðsljósið í kvöld og það reyndar óháð því hvort þeir séu löglegir í leiknum eða ekki. Gefum Gunnari orðið.

Njarðvík 1 - 1 Þróttur

Hér mætast stálin stinn þegar stórvinir mínir og tjallarnir Marc McAusland (F) og Sam Hewson (F) leiða saman hesta sína. Skotinn fljúgandi á að vera í banni (shocking) en bregður sér í líki marbendils og fær leikheimild. Þróttarar ráða illa við díagonalana frá Marc sem kemur grænklæddum á bragðið með kollspyrnu eftir hornspyrnu á stórhættulegum stað. Ian David skiptir svo sjálfum sér inn á og jafnar í uppbótartíma eftir huggulegan undirbúning Sáms.

Vert að benda á að Marc McAusland sem Gunnar segir að eigi að vera í banni tók að sjálfsögðu út leikbannið í tapi gegn Grindavík á dögunum. :

Sigurlausir Njarðvíkingar spila sinn fyrsta eiginlega heimaleik í kvöld. Vissulega eru aðeins um 200 metrar eða svo frá Raholtsvellinum að gervigrasinu við Nettóhöllina þar sem liðið lék heimaleik sinn gegn Ægi á dögunum en heima er alltaf best.

Njarðvíkingar ætluðu sér eflaust að vera búnir að setja fleiri stig á töfluna eftir þrjá leiki en jafntefli gegn Gróttu og Ægi færa liðinu stigin tvö sem í sarpinn eru komin. Liðið mætti Grindavík í Suðurnesjaslag í síðustu umferð og þurfti að sætta sig við 1-0 tap þar.

Gestirnir úr Laugardal mæta á Rafholtsvöllinn með kassann úti eftir að hafa unnið sinn fyrsta sigur í mótinu í siðustu umferð. Eftir tap og jafntefli í fyrstu tveimur umferðunum fengu Þróttarar lið Ægis í heimsókn og höfðu þar 3-1 sigur.

Það verður áhugavert að sjá hvernig lið Þróttar bregst við aðstæðum í kvöld en í fyrstu þremur leikjum sumarsins hafa þeir leiki á gervigrasi en í kvöld mæta þeir í fyrsta sinn þetta sumarið á náttúrulegt gras. Munar þar einhverju um? Maður bara spyr.

Heil og sæl kæru lesendur og verið hjartanlega velkomin í beina textalýsingu Fótbolta.net frá nýliðaslag Njarðvíkur og Þróttar í Lengjudeild karla frá Rafholtsvellinum í Njarðvík.