SKÝRSLAN: Jakob var munurinn á Akureyri
Hvað réði úrslitum?
Leikurinn var jafn og opinn nánast allan tímann, en tempóið hafði lækkað ansi mikið síðasta korterið. KA fann þá einhvern extra gír í restina, sem að gestirnir hreinlega áttu ekki til. Jakob hafði komið inná sem varamaður og boltinn ekki fallið mikið fyrir hann fram að þriðja marki KA, en hann stýrði sendingu Þorra glæsilega í mark Fram og rak svo smiðshöggið í uppbótartíma.
Bestu leikmenn
1. Bjarni Aðalsteinsson (KA)
Átti marga frábæra spretti í gegnum miðjuna og fann sér oftar en ekki gott pláss til þess að skapa hættu fyrir heimamenn. Það er alvöru vél þarna sem að hefur enn gott rými fyrir bætingar.
2. Jakob Snær Árnason (KA)
Það er erfitt að horfa framhjá manninum sem að tryggði KA sigurinn í dag, þó að það hafi kannski lítið annað fallið með honum. Það skiptir bara ekki einu einasta máli þegar að þú nýtir færin þín jafnvel og Jakob gerði í dag. Hann var munurinn þegar að uppi er staðið.
Atvikið
Af nægu er að taka, en fjórða mark KA var virkilega fallegt. Utanfótarsending Hallgríms á Willard er Húsvíkingurinn í hnotskurn. Hrein gæði og uppfinningasemi. Afgreiðsla Jakobs var svo glimrandi góð.
Hvað þýða úrslitin?
KA menn fara upp í 5. sætið og eru með 14 stig eftir 10 leiki. HK eiga leik til góða og gætu með sigri farið upp fyrir þá. Fyrir þá gulklæddu þýðir ekkert annað en að setja hausinn niður og taka einn leik í einu og sjá hverju það skilar þeim. Fram eru áfram í 9. sæti og vilja sjálfsagt fara að tengja saman sigra til þess að forðast falldrauginn sem fyrst.
Vondur dagur
Þetta var kannski ekki frábær dæmi um gott varnarskipulag. Leikurinn var ansi opinn og þó að hann hafi kannski ekki verið morandi í opnum marktækifærum að þá virtust leikmenn beggja liða oft fá býsna fría flugbraut til þess að keyra með boltann óáreittir. Það ætti kannski ekki að kvarta yfir því þar sem að við fengum 6 mörk...
Dómarinn - 8
Sýndist hann vera með stóru ákvarðanirnar réttar og lét leikinn bara fljóta vel.