SKÝRSLAN: Vestri með sinn fyrsta sigur í Lengjudeildinni.
Hvað réði úrslitum?
Rauða spjaldið hjá Robert. Alltaf er maður að sjá eitthvað nýtt á fótboltavellinum. Að hann skuli ákveða að grípa boltann á miðjum vellinum er gjörsamlega óskiljanlegt og hann þarf væntanlega að svara fyrir þetta inn í klefa Njarðvíkurmanna.
Bestu leikmenn
1. Deniz Yaldir
Spilaði í vinstri bakverði í vörn, miðjunni í sókn. Þetta var að virka fyrir hann, var allt í öllu í uppspilinu og nældi sér í tvær stoðsendingar í kaupbæti.
2. Gustav Kjeldsen
Lykilmaður í vörninni í dag. Sópaði allar fyrirgjafir burt og hélt Rafael Victor í skefjum. Hreint lak í dag og hann á stóran þátt í því
Atvikið
Ég er eins og biluð plata hérna, rauða spjaldið var leikurinn í dag. Stóra pissumálið er ennþá óleyst og verður það sennilega um ókomna tíð.
Hvað þýða úrslitin?
Vestri jafnar Njarðvík að stigum um miðja deild og horfurnar fyrir þá batna talsvert fyrir framhaldið. Þessi leikur varð að vinnast og hann gerði það, þótt að það hafi ekki verið framkvæmt með listrænum hætti.
Vondur dagur
Robert átti náttúrulega ömurlegan dag en liðið hans var litlu skárri. Vantaði elju og dug í Njarðvíkurmenn í dag og virtust hreinlega gefast upp við það að verða manni færri.
Dómarinn - 7
Fínn leikur hjá Guðmundi, engar rangar ákvarðanir og hélt mönnum á mottunni með gulu kortunum sínum.