SKÝRSLAN: Þeir elska uppbótartímann
Hvað réði úrslitum?
Blikar fundu ekki nægilega mikinn takt í fyrri hálfleik, vinnusamir FH-ingar gerðu vel. Þjálfarateymi heimamanna setti inn menn af bekknum og færðu menn til með góðum árangri. Flott frammistaða hjá grænum í seinni hálfleik og þeir náðu verðskuldað að jafna. Í uppbótartímanum komu svo tvö mörk, aftur er uppbótartíminn að gefa vel í Kópavoginum.
Bestu leikmenn
1. Gísli og Klæmint komu öflugir af bekknum
Tvöföld skipting í hálfleik. Gísli Eyjólfsson geislar af sjálfstrausti og bjó til vesen fyrir FH-inga, beinskeyttur og með drifkraft. Klæmint Olsen skoraði tvö mörk. Þeir breyttu þessum leik. Ágúst Hlynsson á líka skilið hrós fyrir að stíga verulega upp í seinni hálfleik, gekk betur eftir að hann var færður hægra megin.
2. FH gerði Breiðabliki erfitt fyrir
Greinilegt er að Heimir hefur náð að fá FH-inga til að leggja sig 100% fram í öllum leikjum og liðið lék stóran hluta mjög vel sem ein heild. Ástbjörn Þórðarson heldur áfram að vera gríðarlega öflugur og Kjartan Kári átti hættulegar fyrirgjafir.
Atvikið
Þriðja mark Blika, síðasta mark leiksins. Gísli Eyjólfsson gjörsamlega lék sér að andstæðingum sínum, tók frábæra syrpu og renndi boltanum á Klæmint sem þakkaði fyrir sig. Alvöru tilþrif hjá Gísla.
Hvað þýða úrslitin?
Breiðablik verður í pottinum þegar dregið verður í undanúrslit Mjólkurbikarsins á morgun. Það er möguleiki á úrslitaleik milli Breiðabliks og Víkings... draumur hins hlutlausa fótboltaáhugamanns. FH og Breiðablik mætast aftur á laugardaginn, þá í deildinni og þá á grasi á Kaplakrikavelli. Það verður áhugaverð rimma.
Vondur dagur
Vond uppskera FH-inga á gervigrasi heldur áfram. Fyrir utan sigra gegn liðum úr neðri deildum hefur FH ekki unnið andstæðinga úr efstu deild á gervigrasi síðan 2021. Staðreynd sem sumir stuðningsmenn FH eru þreyttir á að sé í umræðunni en það er bara ein leið að binda enda á þá umræðu.
Dómarinn - 7
Dómarinn var í aukahlutverki, eins og það á að vera.