SKÝRSLAN: Jafntefli í æsispennandi stórleik
Hvað réði úrslitum?
Blikarnir voru sterkari aðilinn í byrjun en Þróttarar uxu inn í leikinn þannig að þegar kom að seinni hálfleik voru þær ofan á í baráttunni. Uppskeran úr því varð 2 mörk á stuttum kafla en Blika konurnar náðu að svara 5 mínútum seinna úr vel útfærðri hornspyrnu. Síðustu 20 mínúturnar voru svo æsispennandi með færi á báða bóga en boltinn neitaði að fara aftur inn.
Bestu leikmenn
1. Tanya Laryssa Boychuk (Þróttur R.)
Tanya Boychuk var algjörlega framúrskarandi í leiknum og átti skilið að skora að minnsta kosti eitt annað. Hún lagði þó upp og skoraði þannig hún er klárlega kona þessa leiks.
2. Taylor Marie Ziemer (Breiðablik)
Taylor var mjög skotglöð í þessum leik og voru þessi skot misgóð. Hún skoraði þó jöfnunarmarkið og var mjög virk í sóknarleik Blika. Með smá heppni hefði sláarskot hennar farið aðeins neðar og hún hefði skorað sigurmark leiksins.
Atvikið
Þessar 2 mínútur þegar Þróttarar skora mörkin sín voru rosalegar og Tanya Boychuk á þarna líkast til bara hennar bestu 2 mínútur á ferlinum.
Hvað þýða úrslitin?
Algjörlega óbreytt staða á toppi deildarinnar þar sem Valsarar gerðu líka jafntefli og Blikarnir enn 3 stigum á eftir.
Þróttarar missa hinsvegar FH yfir sig þar sem Hafnfirðingarnir unnu í kvöld.
Vondur dagur
Enginn sem stendur upp úr sem átti eitthvað sérstaklega slæman leik og þess vegna verð ég því miður að gefa Telmu Ívarsdóttir þetta. Hún var búin að eiga afbragðs leik þar sem hún átti eina stórkostlega vörslu í fyrri hálfleik en seinna markið sem hún fær á sig er niðri í markmannshorninu og Telma missir boltan undir sig. Telma á að gera betur þarna.
Dómarinn - 8
Elías og hans teymi dæmdu leikinn bara vel. Var ekkert að flauta of mikið og leyfði leiknum að flæða. Þó að einn Þróttarinn í stúkunni vildi meina annað.