Áhugaverður varamarkvörður á skýrslu hjá Blikum Glöggir lesendur hafa kannski tekið eftir því að það er ekki sami varamarkvörður á bekk Breiðabliks sem hefur verið síðustu leiki en fyrir þennan leik er það fyrrum landsliðskonan Rakel Hönnudóttir.

Það sem er nú kannski einna athugaverðast við það er að hún hefur spilað sem miðjumaður eða framherji eiginlega allan sinn feril.

Edit: Fréttaritara hafa borist þær fréttir að þetta er alls ekkert í fyrsta skipti sem þetta hefur komið fyrir.
Hér er hún í leik með Blikum árið 2020

Byrjunarliðin eru komin! Breiðablik gerir 2 breytingar á sínu liði en það eru þær Katrín Ásbjörnsdóttir og Áslaug Munda Gunnlaugsdóttir sem koma inn í liðið á kostnað Andreu Rut Bjarnadóttir og Birtu Georgsdóttir.

Þróttarar gera þrjár breytingar en það eru Freyja Katrín Þorvarðardóttir, Sierra Marie Lelii og María Eva Eyjólfsdóttir sem koma inn í liðið á kostnað Ólafar Sigríðar Kristinsdóttir, Álfhildi Rósu Kjartansdóttir og Leu Björt Kristjánsdóttir.

Magnús Haukur spáir Magnús Haukur Harðarsson þjálfari Fjölnis spáði í þessa umferð og þetta er hans spá fyrir þennan leik.

Breiðablik 3 - 3? Þróttur R.
Leikur sem á skilið 1000+ áhorfendur en þessi orrusta verður rosaleg. Það mun reyna á hóp Þróttar í þessum leik en bæði meiðsli og leikbann setja Nik í þá stöðu að aðrir leikmenn þurfa að fara stíga upp. Hjá Blikum hafa síðustu leikir farið vel og er komið sjálfstraust í hópinn. Þessi leikur mun gefa stuðningsmönnum liðanna alvöru rússíbanaferð en Birta Georgs skorar fyrstu tvö mörk leiksins en Olla minnkar muninn á 43 mínútu. Eldræða rave meistarans Nik Chamberlain skilar inn tveimur mörkum á fyrstu tuttugu í seinni en Ásta Eir jafnar leikinn þegar lítið er eftir. Þróttarar fá svo vítaspyrnu á 93. mínútu en þú þarft að mæta á völlinn til að sjá hvort þær skori eða ekki.
Magnús Haukur

Dómari leiksins Elías Ingi Árnason er dómari þessa leiks en honum til aðstoðar verða Guðmundur Ingi Bjarnason og Bergur Daði Ágústsson.

Eftirlitsmaður er Hjalti Þór Halldórsson og varadómari er Guðmundur Páll Friðbertsson.
Elías Ingi Árnason

Gengi Þróttara verið köflótt Þróttarar sitja í 3. sæti deildarinnar með 13 stig 3 stigum á eftir andstæðingi sínum í kvöld Breiðablik. Það hefur gengið brösulega að tengja saman sigra fyrir liðið en það hefur ekki gerst síðan þær unnu fyrstu 2 leiki tímabilsins. Þróttarar töpuðu fyrir Keflavík í síðustu umferð 2-1.

Tanya Laryssa Boychuk er markahæst í liðinu með 4 mörk en á meðan markaskorun hefur verið nokkuð góð hjá liðinu með 14 mörk í heildina þá hefur varnarleikurinn ekki verið jafn góður. Liðið hefur fengið á sig 12 mörk og ekki haldið hreinu í einum einasta leik hingað til.

Tanya Laryssa Boychuk

Blikar taplausar 4 leiki í röð Breiðablik situr í 2. sæti deildarinnar með 16 stig aðeins 3 stigum á eftir toppliði Vals. Liðið byrjaði tímabilið aðeins hikstandi en þær töpuðu fyrir Val og Þór/KA í fyrstu og fjórðu umferð. Síðan þá hafa þær verið taplausar og einu stigin sem þær hafa misst var jafntefli gegn sterku liði Stjörnunnar.

Andrea Rut Bjarnadóttir er markahæst í liðinu með 4 mörk en þeim hefur tekist að dreifa markaskorun mjög vel þar sem liðið hefur skorað mest allra liða í deildinni eða alls 19 mörk.
Andrea Rut Bjarnadóttir

Stórleikur umferðarinnar Komiði sæl og verið velkomin í beina textalýsingu frá stórleik umferðarinnar milli Breiðabliks og Þróttar.

Leikið verður á Kópavogsvelli og það hefst klukkan 19:15