SKÝRSLAN: Magnaður Ísak Andri tryggði Garðbæingum þrjú stig
Hvað réði úrslitum?
Einstaklingsgæði Ísaks Andra komu Stjörnunni á bragði og leiddi liðið snemma 2-0 eftir það var ljóst í hvað stefndi. Staðan var 3-0 í hálfleik og lítil von Hafnfirðinga fjaraði út í upphafi seinni hálfleiks þegar fjórða markið kom. FH mætti aldrei til leiks og Heimir þarf að fara vel yfir þetta með sínu liði til að koma í veg fyrir að þetta gerist aftur.
Bestu leikmenn
1. Ísak Andri Sigurgeirsson
Þetta er auðveldasta val sumarsins. Oft á tíðum var eins og Ísak Andri væri að keppa á móti börnum. Lék sér að Ástbirni trekk í trekk og einstaklingsgæðin eru svo mikil í þessum dreng að þau leka einfaldlega af honum. 4 af 5 mörkum dagsins eru að miklu leiti honum að þakka. Gæti verið einn af hans seinustu leikjum í Bestu deildinni því að þessi leikmaður gæti spilað á töluvert hærra kaliberi.
2. Örvar Logi Örvarsson
Öflugur í vinstri bakverðinum í dag. Hélt bæði Kjartani Kára og Vuk Óskari vel í skefjum og gerir þeim erfitt fyrir. Örvar er einnig með mjög góðan vinstri fót og er með tvær stoðsendingar í dag. Einn af fjölmögum uppöldum Stjörnustrákum sem er gaman að horfa á þegar hann er á deginum sínum. Ætla samt að minnast líka á SIlfurskeiðina sem var frábær í stúkunni í dag.
Atvikið
Einstaklingsframtak Ísaks Andra í öðru markinu í dag var augnakonfekt. Ástbjörn Þórðarson og fyrirliðinn Eggert Gunnþór litu út eins og smástrákar að reyna stöðva Ísak áður en hann leggur boltann fyrir Emil Atlason sem skoraði sitt annað mark.
Hvað þýða úrslitin?
Stjarnan fer upp úr fallsæti og skilur Fylki eftir þar. Stjarnan er nú í 8. sæti. FH er enn í 4. sæti þremur stigum á undan KR og þremur stigum á eftir Breiðabliki.
Vondur dagur
Ástbjörn Þórðarson átti sannkallaðan hauskúpuleik í dag. Réði ekkert við Ísak Andra sem lék sér að honum trekk í trekk. Eggert Gunnþór var þó ekki mikið skárri. Tveir leikmenn sem verða að spila betur ef FH á að vinna eitthverja leiki.
Dómarinn - 8
Ekkert út á Ívar að setja í dag. Vítaspyrnudómurinn var hárréttur og hélt sinni línu vel í dag. Vel dæmdur leikur hjá einum af okkar fremstu dómurum.