SKÝRSLAN: Vestri með sannfærandi sigur
Hvað réði úrslitum?
Vestri voru mun sterkari nánast allan leikinn. Þeirra besti leikur í sumar á meðan Grótta sennilega ekki verið slakari. Miðjan hjá Vestramönnum með þá Fatai, Nacho Gil og Ibrahima Balde stýrði þessum leik og Grótta náði aldrei að spila sig í gegnum þá.
Bestu leikmenn
1. Fatai Gbadamosi
Snöggur að loka á allt uppspil Gróttu og ekkert fór í gegnum hann. Afar öruggur á boltann og miðja Vestramanna hafði öll tök á þessum leik.
2. Gustav Kjeldsen
Ég gæti nefnt alla leikmenn Vestra svo sem þar sem liðið átti afar góðan dag. Silas sérlega ógnandi og Elvar í vinstri bakverði heillaði mig mikið. En Gustav á einnig lof skilið, þessi stóri Dani sem klettur í vörninni og átti einnig tvær stoðsendingar í dag.
Atvikið
Grótta vildi fá víti í stöðunni 2-0, Vestri vann boltann og skoraði þriðja markið strax í kjölfarið. Leikmyndin hefði augljóslega breyst mikið ef dómarinn hefði bent á punktinn þar.
Hvað þýða úrslitin?
Liðin eru nú jöfn að stigum í 5. og 6. sæti. Eiga bæði leik til góða á Leikni sem er í 4. sæti og eru því í rækilegri baráttu um að komast í umspilið.
Vondur dagur
Enginn hjá Gróttuliðinu átti góðan dag. Lítil ógn í uppspili og gekk illa að halda boltanum um leið og hann fór úr vörninni. Megnið af leiknum reyndu þeir bara að spila upp hægri vænginn og notuðu lítið vinstri hlutann á vellinum sem veit ekki á gott.
Dómarinn - 7
Ágætur bara. Einhver köll á vítaspyrnur en ég sá ekki hvort eitthvert þeirra átti rétt á sér. Annars virtust gulu spjöldin rétt og hann kom flæði á leikinn eftir mikil stopp í upphafi.