Þetta var frekar dapur fótboltaleikur heilt yfir og alltof lítið sem gladdi augað upp við mörkin. Seinni hálfleikurinn var mjög kaflaskiptur, fyrst dómineraði Grótta og komst oft í góðar stöður, en ekki mikið um góð færi, seinni hlutann tók Afturelding svo yfir, spilaði vel fyrir utan teiginn en það var eins og menn hefðu ekki sjálfstraust til að reyna að koma boltanum í netið. Í teignum skoppaði boltinn framhjá þeim, menn kiksuðu eða þaðan af verra. Jöfnunarmarkið hjá Bjarna var flott og bjargaði andliti heimamanna.

Eftir klukkutíma leik kom Jökull Jörvar Þórhallsson inná hjá Aftureldingu sem hefði ekki verið frásögur færandi nema fyrir það að þarna spilaði hann sinn 100. leik fyrir félagið. Jökull er 25 ára og kom til félagsins árið 2018 og spilar alltaf flesta leiki liðsins.

Ég held að stigið hafi skipt verulega máli fyrir Aftureldingu í baráttunni við að halda toppsætinu út mótið. Vissulega var helsti keppinautur þeirra, ÍA að tapa á sama tíma, en það getur alltaf stuðað mannskapinn að tapa tveimur leikjum í röð. Að sýna fyrir sjálfum sér að þeir geti jafnað í lokin getur verið sterkt andlega. Stigið gefur Gróttu svo það að þeir eru í 5. sætinu og eiga leik til góða á Leikni sem er í 4. sæti. Sá leikur sem þeir eiga til góða er gegn ÍA á þriðjudaginn og sigur þar þýðir að Grótta er í 4. sætinu.

Mér fannst Yevgen Galchuk markvörður Aftureldingar eiga að verja skotið sem Kristófer Orri skoraði úr, og í raun bara klaufalegt að halda ekki þessum bolta eða þá koma í veg fyrir að hann rúllaði svo yfir hann og í markið. Þar fyrir utan ekkert mikið upp á hann að klaga.

Fínasta frammistaða hjá Guðgeiri heilt yfir. Menn veltu fyrir sér vítaspyrnudómi þegar Bjarni féll í teignum en það var þó mest úr stúkunni. Ákvað að spjalda ekki sitthvorn leikmann úr báðum línum fyrir að skjóta á markið löngu eftir að búið var að flauta en það heitir að halda línu er það ekki?