Hraðinn og krafturinn sem kom inn með varamönnum Víkings réði úrslitum. Helgi og Viktor Örlygur lögðu upp á Ara Sigurpáls sem kom boltanum tvisvar í markið og kláraði dæmið. Víkingar eru betri en önnur lið á Íslandi í því að nýta sér minnstu mistök andstæðinganna og hafa verið það í allt sumar. Það er frábær kostur og hefur skilað þeim langt á leið sinni í átt að tveimur titlum í sumar.

Skallamarkið hjá Benoný er geggjað, þriðja marki Víkings hká Ara fer með leikinn og svo er það vítið sem KR átti að fá að mínu mati en var ekki dæmt.

Víkingur er á leið í bikarúrslitin í fjórða skiptið í röð og þriðja árið í röð slær liðið KR úr leik á Víkingsvelli á leið sinni þangað. Víkingur getur unnið keppnina fjórða skiptið í röð og liðið getur úr þessu unnið tvennuna í annað sinn á þremur árum.

Varnarleikur KR í fyrstu tveimur mörkunum er heilt yfir ekki nægilega góður. En innkoma Olav Öby fær þetta, hún var mjög vond, kom inn fyrir Aron Þórð sem var fínn í leiknum, fékk gult spjald og misreiknaði sig illa þegar hann reyndi að spila Ara rangstæðan í þriðja marki Víkinga. Innkomur Öby í síðustu tveimur leikjum af bekknum hafa ekki verið góðar. Valkvíði fréttaritara fær líka vondan dag, tveir valdir bestir og þrjú atvik nefnd.

Eftir að hafa séð atvikið aftur með Benoný inn á vítateig Víkings í fyrri hálfleik þá er það aldrei víti, en Logi brýtur á SIgurði Bjarti í seinni hálfleik, ýtir í hann með báðum höndum og lyftir svo upp einni hendi eins og þetta sé ekkert. Virkar klárt víti, ekkert að hugsa um boltann. Það er svo eiginlega með ólíkindum að Oliver Ekroth hafi ekki fengið spjald fyrir ljótt brot á Elmari í fyrri hálfleik, Elmar nýbúinn að senda boltann þegar Ekroth keyrði harkalega í bakið á honum. Línan í leiknum var allt í lagi, menn máttu alveg ýta aðeins og láta finna fyrir sér sem er besta mál. En KR átti að fá víti í stöðunni 2-1 sem hefði getað haft áhrif á leikinn.