Engin breyting á liði gestanna Sömu ellefu sem byrja leikinn hjá Zrinjski og byrjuðu leikinn í Bosníu fyrir viku síðan.

Byrjunarliðin komin - Brynjar Atli í markinu Óskar Hrafn Þorvaldson, þjálfari Breiðabliks, gerir tvær breytingar á sínu liði frá fyrri leiknum sem fór 6-2 í Bosníu.

Viktor Karl Einarsson tekur út leikbann og inn í liðið kemur Davíð Ingvarsson. Brynjar Atli Bragason ver mark Blika og Anton Ari Einarsson tekur sér sæti á bekknum.

Á heimasíðu UEFA er Davíð Ingvarssyni stillt upp á vinstri kantinum með Gísla Eyjólfsson fyrir aftan sig vinstra megin á þriggja manna miðju í leikkerfinu 4-3-3.

Samt góðar líkur á að Breiðablik komist í riðlakeppni Þrátt fyrir þessi úrslit í fyrri leiknum þá eru góðar líkur á því að Blikar komi sér í riðlakeppni í Evrópu. Ef liðið dettur út gegn Zrinjski Mostar, eins og allt stefnir í, þá færist liðið niður í umspil fyrir riðlakeppni Sambandsdeildarinnar.

Þar verður mótherjinn Struga frá Norður-Makedóníu eða Swift Hesperange frá Lúxemborg. Struga vann heimaleikinn 3-1.

Þess má geta að í umferðinni á undan vann Struga einvígi gegn Buducnost frá Svartfjallalandi samtals 5-3 (1-0 heima og 4-3 úti). Breiðablik vann Buducnost 5-0 á Kópavogsvelli í lok júní svo möguleiki Blika verður að teljast ansi góður.

Vilja gera Z. Mostar óttaslegna „Frammistaðan er eitthvað sem við þurfum að taka með okkur í næsta verkefni, það er mikilvægt að hún sé góð. Við getum tekið fullt út úr seinni hálfleiknum, eftir að við fengum á okkur sjötta markið þá gerðum við margt mjög vel og sýndum ákveðinn karaktersstyrk að leggjast ekki alveg niður og gefast upp. Það er mikilvægt upp á að ná takti og vera með sjálfstraust; frammistaðan á morgun er mikilvægari en úrslitin. Við viljum reyna koma þeim niður á jörðina og gera þá óttaslegna, ýta aðeins á þeim, það er markmið, en þetta byrjar allt og endar á góðri frammistöðu."

Óskar sagði að auðvelt hefði verið að koma leikmönnum í andlegt jafnvægi eftir 6-2 skellinn úti í Bosníu. Eftir jafnteflið gegn KA á Akureyri hafði Óskar þetta að segja.

„Það var bara mjög auðvelt. Við höfum verið góðir í því að standa upp eftir högg og vitum hvað gerðist. Við vitum af hverju þetta fór eins og þetta fór og partur af því er að menn lentu á vegg - menn klessukeyrðu á vegg, andlega og líkamlega. Á móti liðum eins og Zrinjski, þetta er feykilega öflugt lið með mikla Evrópureynslu, þá er þér bara refsað þegar þú ert orðinn örmagna. Við náðum okkur einhvernveginn aldrei strik og það er ekkert erfitt að kasta slíkum leik á bakvið sig. Þetta lið er búið að eiga marga frábæra leiki í Evrópu og einhvernveginn hafa þeir líka skilið að stundum verða menn þreyttir. Stundum bera fæturnir þá ekki og allt skýjað í hausnum, en það er búið að vera mikið álag þannig að þetta var leikurinn þar sem að við lentum á vegg. Svo er það bara okkar allra að stíga upp eftir það, en þegar að sjálfsmyndin er sterk sem að hún er hjá Blikaliðinu að þá er það yfirleitt ekkert vandamál,'' sagði Óskar Hrafn.

Frammistaðan í kvöld skiptir öllu máli „Ég legg þetta upp þannig að við þurfum fyrst og fremst að sauma saman góða frammistöðu og sjá hvert það tekur okkur. Við þurfum að hafa stjórn á hlutunum, læra af því sem við gerðum ekki vel í Bosníu. Það mikilvægasta er frammistaðan, að vera ekki endilega að hafa áhyggjur af því hver munurinn er. Auðvitað viljum við komast eins nálægt þeim og hægt er og lokatakmarkið er að slá þá út, en ég held það sé hættulegt að ætla fara og reyna skora fimm mörk á fyrstu fjórum mínútum og svo gengur það ekki upp. Við þurfum að byrja á því að spila vel, vera kröftugir, öflugir og óttalausir," sagði Óskar.

Planar Óskar einhverja öðruvísi ræðu fyrir leikinn í dag heldur en hann gerði fyrir fyrri leikinn. „Auðvitað á hver leikur sitt líf og þetta er aðeins öðruvísi staða sem við erum í núna. Þegar við fórum út snerist þetta um að ná frumkvæði í einvíginu og þú ferð líka út í ákveðna óvissu, finnur ekki styrk andstæðingsins fyrr en þú stendur á hliðarlínunni og upplifir hann. Leikurinn á morgun er öðruvísi, snýst um okkur miklu frekar en þá, snýst um að við saumum saman góða og þétta frammistöðu; verði góð og þétt lopapeysa en ekki gisin einhvern veginn og slöpp - illa prjónuð. Þetta snýst um stoltið, virðinguna og að við náum góðum takti fyrir lokahnykkinn á þessum brjálæðiskafla sem við erum búnir að vera í síðan landsleikjahléinu lauk," sagði Óskar í viðtali við Sæbjörn Steinke fréttamann Fótbolti.net fyrir nokkrum dögum.

Enn eitt Evrópukvöldið á Kópavogsvelli Heilir og sælir lesendur góðir og veriði hjartanlega velkomnir í þráðbeina textalýsingu frá Kópavogsvelli þar sem að Breiðablik fá Z. Mostar í heimsókn en fyrri leikurinn endaði með ótrúlegum 6-2 sigri Bosníumanna.