SKÝRSLAN: Þróttarar færast nær 2. sætinu
Hvað réði úrslitum?
Frammistaða Þróttar í seinni hálfleik. Blikar voru með yfirhöndina í fyrri hálfleiknum og fengu mörg góð tækifæri til að ná forystunni. Það tókst þeim hins vegar ekki og Þróttarar náðu að koma inn mikilvægu marki á 44. mínútu, þvert gegn gangi leiksins. Gestirnir komu svo tvíefldar út í seinni hálfleikinn og hreinlega keyrðu yfir Blika sem tókst aldrei að finna takt í seinni hálfleiknum.
Bestu leikmenn
1. Katie Cousins
Skoraði gríðarlega mikilvægt mark rétt fyrir hálfleikinn sem kom Þrótti almennilega inn í þennan leik. Sýndi gæði sín í því marki og var svo frábær í seinni hálfleiknum og var að skapa mikið fyrir liðsfélaga sína ásamt því að skora síðasta mark leiksins.
2. Tanya Laryssa Boychuk
Var í vandræðum með að velja þetta þar sem margar í Þrótti komu vel til greina. Tanya var mjög góð í kvöld, sérstaklega í seinni hálfeiknum og skoraði fáránlega flott mark og átti líka stoðsendingu. María Eva og Sæunn voru geggjaðar líka!
Atvikið
Fyrsta mark Þróttar á 44. mínútu leiksins, algjörlega gegn gangi fyrri hálfleiksins. Maður trúði varla að Þróttur væri að fara með forystuna inn í hálfleikinn.
Hvað þýða úrslitin?
Ef Blikar voru með einhverjar titilvonir fyrir þennan leik þá má segja að þær séu endanlega úr sögunni núna. Þær halda þó 2. sætinu með 34 stig, 11 stigum á eftir Val. Þróttarar eru þó að nálgast og horfa klárlega á þetta 2. sæti. Sitja í 4. sæti en eru stigi á eftir Stjörnunni og aðeins þremur stigum á eftir Blikum.
Vondur dagur
Eftir flottan fyrri hálfleik þá horfði maður á Blikaliðið brotna í mótlætinu í seinni hálfleik. Þeim virðist skorta sjálfstraust enda lítið gengið undanfarið. Nýtt þjálfarateymi Breiðabliks fer ekki vel af stað, ekki óskabyrjun að tapa 4-0 á heimavelli.
Dómarinn - 7.0
Heilt yfir bara fínt. Þónokkuð að smáatriðum sem maður var ekki alveg viss með en hafði ágæt tök á leiknum og var með stærri ákvarðanir á hreinu.