Liðin eru að ganga út á völlinn

Bjó á Verbúð í Bolungarvík Hebbi er farinn að þenja röddina í kerfinu, þá veistu að þetta er að bresta á. Liðin eru komin inn í klefa og bíða þess að Helgi Mikael flauti þau út á völl.

Vilhjálmur Inn Það fór framhjá mér að Vilhjálmur Yngvi Hjálmarson byrjar leikinn, Guðmundur Karl Guðmundsson er á bekknum. Guðmundur Karl er á hættusvæði varðandi leikbann, höfum auga með því ef að hann kemur við sögu í leiknum.

Nóg af nostalgíu í bili. Liðin eru að hita upp, sjoppan er opin, burgers á grillinu og fólk er að fylla stúkuna. Kaffi og kók á mig. Allir klárir eina.

Eitt helsta sameiningartákn þessa tveggja félaga er hinn hjartagóði Þórður Ingason. Spilaði með Fjölni 2004-2009 og aftur 2013-2018. Einnig spilaði hann við góðan orðstír hér í tvö tímabil fyrir vestan. 2011-2012. Sendi skilaboð á hann og heimtaði spá, von á henni von bráðar. Hann er auðvitað nýbakaður bikarmeistari, varði markið eins og kóngur um helgina. Legend in the game.

Talandi um stóra leiki Þegar maður hugsar um stóra leiki á Torfnesi þá koma tveir sterkt upp í hugann. 8 liða úrslit í bikar 2011 gegn Breiðablik. Sölvi Gylfi Gylfason með tvö mörk í framlengingu og Andri Rúnar eitt, 4-1. Heimaleikur við KR í undanúrslitum tók við og Gunnar Már "Wonderboy" Elíasson skoraði mark sem þarf að rifja upp vikulega í það minnsta. Úrslit leiksins öllum gleymd.

Smelltu hér til að sjá markið fræga

Stærsti leikur Vestra frá upphafi Þessi úrslitakeppni gefur Vestra tækifæri á því að spila í efstu deild í fyrsta skipti í sögu nafnins. Alvöru öskubuskusaga ef svo verður raunin! Ég býst við hörku stemmningu í dag, það eru allar kaffistofur bæjarins að tala um leikinn!

Byrjunarliðin klár! Tarik Ibrahimagic byrjar leikinn á miðjunni, Fatai situr á bekknum. Örlítið sókndjarfara lúkk á miðjunni. Tarik kom frá Dannmörku á miðju tímabili og hefur náð að vinna sig inn í liðið. Davíð Smári veit að hann þarf að skora mörk hérna í dag. Hjá Fjölnismönnum hvílir Óliver Dagur Thorlacius og Bjarni Þór Berndsen startar í dag í hans stað.

Líklegt byrjunarlið Fjölnis Keli lagði pensilinn frá sér autt augnablik og stillti upp líklegu Fjölnisliði

Líklegt byrjunarlið Vestra

Leikurinn í beinni á Youtube

Fyrri leikir liðanna Fyrri leikur liðanna í sumar fór fram í Grafarvogi 24. júní. Óliver Dagur Thorlacius kom heimamönnum yfir á 63. mínútu en Tufa jafnaði þremur mínútum síðar. Fleiri mörk voru ekki skoruð, 1-1 lokatölur. 8 gul spjöld fóru á loft í leiknum.

Fjölnir 1-1 Vestri
Oliver Dagur Thorlacius 63'
Vladimir Tufegdzic 66'

Seinni leikurinn fyrir vestan fór fram 26 ágúst. Mörk frá Gustav Kjeldsen og Benedikt Warén ásamt sjálfsmarki frá áðurnefndum Oliver Dag tryggðu sigur heimamanna. Bjarni Gunnarson skoraði mark Fjölnismanna, 3-1.

Vestri 3-1 Fjölnir
Gustav Kjeldsen 9'
Bjarni Gunnarson 37'(v)
Oliver Dagur Thorlacius 44'(og)
Benedikt Warén 88'

Oliver Dagur búinn að skora fyrir bæði lið í sumar

Nokkrir molar -Stuðlarnir á Lengjunni eru hnífjafnir fyrir leikinn, 2.30 á Vestra og 2.38 á Fjölni

-Fjölnir voru síðast í bestu deildinni árið 2020 þar sem þeir féllu í styttu móti vegna veirunnar

-Vestri hefur aldrei spilað í efstu deild, þó eru Ísfirðingar alvanir knattspyrnu á efsta stigi en ÍBÍ lék í efstu deild 1962, 1982 og 1983.

-Helgi Mikael Jónasson er dómari leiksins í dag, sjóðandi heitur eftir bikarúrslitaleikinn um helgina. Hann er skráður í Boltafélag Norðfjarðar en á leiki í 2. flokki með Breiðablik, Val og FH

-Mottó Boltafélags Norðfjarðar er Secundus Pila, eða seinni bolti. Það er viðeigandi í þessum leik þar sem leikir á Íslandi síðla september snúast oftar en ekki um baráttu og vilja og jú, þennan blessaða seinni bolta.

-Leikurinn verður líklega síðasti leikurinn á Torfnesi á grasi. Leggja á gervigras á gömlu ruslahaugana í vetur og verður tilbúið fyrir næsta tímabil ef allt gengur eftir.

Tímabilið hjá Fjölni Tímabilið hjá Fjölni er talsvert ólíkt Vestra. Þeir byrjuðu frábærlega, töpuðu ekki fyrr en í 9. umferð og voru lengi vel í samtalinu um fyrsta sætið í deildinni. Sæti í úrslitakeppni var í rauninni aldrei í hættu en þá helst um miðbik sumars þegar kom smá kafli þar sem betur mátti fara, tap á heimavelli gegn Selfoss stendur þar uppúr. Úlfur þjálfari stelur oftar en ekki fyrirsögnunum en á bak við hann er þétt og gott lið, þeir enda einu stigi á eftir Aftureldingu og markatalan góð. Bjarni Gunnarson er markahæsti maður liðsins með 10 mörk en alls hafa 17 leikmenn skorað fyrir liðið í sumar. Það lýsir Fjölni ágætlega, erfitt að fara að beina sjónum á einstaka leikmenn þar sem breiddin er góð og liðið er framar öllu. Máni Austmann, Dofri Snorra, Hákon Ingi, Guðmundur Karl, Daníel Ingvar, listinn er langur af góðum leikmönnum í hópnum.

Tímabilið hjá Vestra Það hefur verið mikill stígandi í gengi Vestra þetta tímabilið. Þetta byrjaði hægt, 2 stig eftir fyrstu fjórar umferðirnar. Fengu á sig klaufaleg mörk og skoruðu ekki mikið á hinum endanum. Sigrar gegn Njarðvík og Leikni komu Djúpmönnum á bragðið og síðan hefur liðið ekki litið til baka. Danirnir tveir mynduðu feiknarsterkt miðvarðarpar og endaði Vestri með fæst mörk fengin á sig í deildinni í sumar. Silas Songani er jókerinn í liðinu, þegar Vestri hendir í góðan skyndibita er hann á tíðum "unplayable". Benedikt Waren hefur verið frábær í seinni umferðinni og Tufa er refur sem skorar alltaf mörkin sín. Vestri eru til alls líklegir í þessu umspili.

Velkomin! Verið hjartanlega velkomin í beina textalýsingu frá leik Vestra og Fjölnis í úrslitakeppni Lengjudeildar karla. Helvika eins og hún hefur verið kölluð útí bæ er hafin, þetta verður algjör veisla!