Erfiðum degi í Bochum lokið. Ekki annað hægt að segja en að sigur Þjóðverja sé fyllilega verðskuldaður og að við höfum átt lítin möguleika í dag. Guðmundur Aðalsteinn Ásgeirsson er á vellinum og má vænta viðtala frá Þýskalandi innan skamms. Við þökkum fyrir okkur í bili.

Þetta er að fjara út hægt og rólega.

Klara Bühl leikur inn á völlinn og reynir skotið. Boltinn af Glódísi og afturfyrir. Tekur frákastið eftir hornið líka en hamrar því yfir markið.

Uppbótartíminn er að minnsta kosti sex mínútur.

Marina Hegering yfirgefur völlinn vegna meiðsla. Þjóðverjar búnar með sínar skiptingar og leika því manni færri. Ekki að það muni breyta neinu úr þessu.

Lea Schüller í skallafæri en í þetta sinn endar boltinn í fangi Telmu sem gerir vel í markinu

Linda Dallman að valda usla á vinstri vængnum en Hildur Antonsdóttir kemur sér fyrir sendingu hennar út í teiginn

Hættuleg hornspyrna Felicitas Rauch frá hægri svífur rétt framhjá færstönginni. Þjóðverjar dæmdir brotlegir í teignum sömurleiðis.

Aftur er Klara Bühl að setja boltann fyrir markið, getum þakkað fyrir að Linda Dallman var skrefinu of sein til að ná til boltans.

Sædís Rún Heiðarsdóttir, leikmaður Stjörnunnar, er að koma inn á í sinn fyrsta A-landsleik.

Trekk í trekk í leiknum bognar liðið undan pressu Þjóðverja og tapa boltanum á hættulegum stöðum við eigin vítateig. Býður hættunni svo sannarlega heim en við höfum sloppið vel í þessum síðari hálfleik á köflum.

Sandra María reynir skot að marki eftir hornið en vill ekki betur til en svo að Lena Oberdorf kemst á milli og fer boltinn aftur beint í andlit Söndru sem liggur eftir.

Hlín með fínan sprett upp hægri vænginn og sækir hornspyrnu fyrir Ísland.

Þetta er alltof einfalt fyrir Þjóðverja að finna svæði til að sækja í. Ein sending og Lea Schüller kemst í 1 á 1 stöðu. Keyrir í átt að marki og reynir að lyfta boltanum yfir Telmu í markinu en sem betur fer svífur boltinn sömuleiðis yfir markið.

Alexandra Popp meö skot frá vítateig sem flýgur yfir markið. Þær þýsku að hóta þriðja markinu.

Þung pressa frá þeim þýsku sem að vinna hornspyrnu og aðra til. Boltinn yfir á fjær þar sem Hegering skallar boltann í átt að marki, Telma missir hann frá sér en Glódís vel á verði á marklínunni og kemur boltanum frá.

Glódís Perla Viggósdóttir deserves to be recognized as one of the best. pic.twitter.com/OgMqGbq81I

— Melly ? | (@Zadraball) September 26, 2023

Heimakonur að gefa í á ný, Sarai Linder með stórhættulega fyrirgjöf fyrir markið frá vinstri sem Popp er hársbreidd frá því að reka ennið í

Sarai Linder mundar skotfótinn en boltinn hátt hátt yfir mark Íslands

Jákvæð fyrsta mínúta að baki. Liðið stígur miklu hærra upp á móti þýska liðinu. Ná fyrirgjöf inn á teiginn en brotið á Merle Frohms og aukaspyrna dæmd.

Brekkan brött og mikið sem mátti laga eftir þennan fyrri hálfleik. Við vonumst til þess að stelpurnar hafi náð að endurskipuleggja sig í hálfleiknum takist að koma sér í betri takt við leikinn. Við spörkum þessu af stað á ný.

Hálfleikur hér í Bochum. Þýskaland betri á öllum sviðum fótboltans; þær eru með meiri gæði, þær eru sterkari, þær eru ákveðnari, þær eru skipulagðari og þær eru hugmyndaríkari en við. Þetta er búið að vera afskaplega erfitt og það þarf að fara vel yfir málin í leikhléinu.

Lohmann með skalla yfir markið. Þetta er bara sókn eftir sókn hjá Þýskalandi. Við eigum engin svör.

Lattwein var alein á teignum eftir fyrirgjöf en var sem betur fer ekki meðvituð um það. Með ömurlega skottilraun þegar hún hefði getað tekið boltann niður.

Popp mætt aftur út á völlinn.

Popp liggur í teignum og þarf aðhlynningu.

Þýskaland fær dauðafæri eftir hornspyrnuna. En íslenska liðið nær að koma sér fyrir skotið. Heimakonur fá aðra hornspyrnu og úr því verður annað flott færi en Telma nær að verja.

Fyrstu tíu mínúturnar voru flottar en síðan þá höfum við bara verið eftir á í öllu.

Þýska liðið að hóta þriðja markinu en Glódís skallar frá.

Íslenska liðið tekur liðsfund út á velli eftir markið. Við verðum að fara að rífa þetta í gang. Það er bara eitt lið á vellinum þessa stundina.

Berglind Rós brýtur af sér. Þjóðverjar yfirspila okkur. Sýnist þetta vera réttur dómur.

Það er mjög lítið að frétta í uppspilinu hjá Íslandi. Ekkert sem bendir til þess að við séum líklegar til að jafna með þessu áframhaldi.

Upp úr innkasti er Popp komin í annað dauðafæri en Telma gerir frábærlega í að koma út á móti og verja skotið. Við megum ekki gera þeim svona auðvelt fyrir!

Vel spilað hjá Þjóðverjum og Popp, fyrirliði þeirra, er komin í fínt færi en Glódís nær að trufla hana nægilega mikið svo hún skjóti fram hjá markinu.

Okkur gengur afskaplega illa þegar við reynum að búa til eitthvað með boltann. Endar yfirleitt hjá þýska markverðinum eða varnarmönnum þeirra.

Það er mikill kraftur í Þýskalandi eftir markið. Þær fá hér hornspyrnu en íslenska liðið gerir vel í því að koma boltanum í burtu.

Þjóðverjar í hættulegri sókn sem endar svo með skoti frá Hendrich af löngu færi. Það fer vel fram hjá markinu.

Það eru afar litlir möguleikar á því að sækja hratt í þessu kerfi sem við erum í, virðist vera.

Selma með aukaspyrnu inn á teiginn og það skapast smá hætta en heimakonur koma boltanum frá, því miður.

Ísland fær innkast ofarlega á vellinum. Núna hefði verið gott að vera með Sveindísi til að setja þennan bolta inn á teiginn. Söknum ekki bara hraða hennar.

Þjóðverjar fá hornspyrnu en Telma gerir vel í að kýla boltann í burtu.

Guðrún með skalla sem fer að eigin marki og endar næstum því í markinu. Telma var óviss og blakar boltanum yfir. Þetta hefði verið klaufalegt.

Þá kom fyrsta tilraunin hjá Þjóðverjum. Þetta var stórhættulegt! Bolti fyrir markið og þar er Brand á fjærstönginni en skalli hennar sem betur fer yfir markið. Hún var alein á fjær og átti að gera betur úr þessu.

Heimakonur hafa ekki enn átt skottilraun. Íslenska liðið agað í byrjun leiks og verður að halda því áfram.

Þjóðverjar með hættulega fyrirgjöf en Ingibjörg gerir afar vel, er á undan í boltann og sækir aukaspyrnu.

Þjóðverjar að byggja upp hættulega sókn en Guðrún gerir vel í að stoppa hana og vinna boltann.

Selma Sól kemur sér í skotfæri rétt fyrir utan teig en það fer í varnarmann. Maður heyrði andköf úr stúkunni þarna.

Karólína er staðin upp, harkar þetta af sér.

Karólína fær högg og heldur um bakið. Vonandi er þetta ekki alvarlegt.

Virðist vera svipuð varnarútfærsla og gegn Wales hjá íslenska liðinu. Erum að verjast í útgáfu af 4-4-2 sýnist mér. Reynum svo að sækja í þriggja manna vörn.

Þá er þetta farið af stað. ÁFRAM ÍSLAND!

Ótrúlega margir þýskir fánar á lofti og það er gríðarlega vel mætt á völlinn. Það er gaman að sjá þessa mætingu en það er vonandi að við Íslendingar náum að skemma þetta partý.

Þjóðadeildarstefið er ekkert eðlilega nett. Liðin að ganga út á völlinn.

Maður finnur fyrir smá taugatitringi í Þjóðverjum fyrir leikinn. Þær þurfa sigur ef þær ætla sér á Ólympíuleikana næsta sumar. Jafntefli eða tap og þá horfa þau á það þannig að draumurinn sé úti.

Geggjuð stemning í Bochum þegar lið Þýskalands er lesið upp, það er frábær mæting og mikil læti. Það væri nú gaman ef það væri svona stemning fyrir landsleiki heima á Laugardalsvelli.

Þjóðverjar hafa lokið upphitun. Vel klappað þegar leikmenn liðsins halda inn í klefa. Þó það gangi illa þá stendur þjóðin þétt við bakið á liðinu sínu.

Ási Haralds, aðstoðarþjálfari liðsins, var að taka góðan pepphring með byrjunarliðinu út á velli. Hann var líka aðstoðarþjálfari þegar við unnum Þýskaland fyrir sex árum síðan.

Í gær var búið að selja rétt tæplega 15 þúsund miða á leikinn en hér er pláss fyrir um 26 þúsund manns. Fólk er að koma sér vel fyrir en það eru einhverjir Íslendingar í stúkunni. Vonandi láta þau vel í sér heyra.

Í byrjunarliði Þýskalands eru sjö leikmenn úr Wolfsburg sem fór í úrslitaleik Meistaradeildarinnar á síðasta tímabili. Eru þar liðsfélagar Sveindísar Jane Jónsdóttur. Þrjár eru liðsfélagar Glódísar Perlu Viggósdóttur hjá Bayern München og þá leikur Sarai Linder með Hoffenheim. Stærsta stjarna liðsins er fyrirliðinn Alexandra Popp en þetta eru allt leikmenn í hæsta klassa.

Three changes from Friday's defeat in Denmark ????

Let's go team! ????

WIR #IMTEAM ???????? #GERISL @DFB_Frauen
???? DFB/Thomas Boecker pic.twitter.com/SSsxbXrxg7

— Germany (@DFB_Team_EN) September 26, 2023

Lagið Parísarhjól með GDRN í tækjunum. Manni líður bara eins og heima sér.

Stelpurnar okkar eru mættar út á völl og fá býsna góðar móttökur frá þýsku áhorfendunum á vellinum í Bochum.

Það eru tvær breytingar á byrjunarliðinu frá sigrinum gegn Wales á Laugardalsvelli. Amanda Andradóttir og Diljá Ýr Zomers fara á bekkinn en inn í þeirra stað koma Guðný Árnadóttir og Berglind Rós Ágústsdóttir. Þessar skiptingar eru varnarsinnaðar en það er ekki skrítið í ljósi þess hve sterkur andstæðingurinn er í kvöld.

View this post on Instagram

A post shared by Knattspyrnusamband Íslands (@footballiceland)

Fyrirfram er Þýskaland sigurstranglegri aðilinn enda er það lið sem endaði í öðru sæti á Evrópumótinu í fyrra. Þær eru með stjörnur í nánast hverri einustu og með gríðarlega mikil einstkalingsgæði. En það ríkir óvissa hjá þýska kvennalandsliðinu þessa stundina, og það eru neikvæðar tilfinningar í spilinu. Þýskalandi gekk afar illa á HM í sumar og liðið tapaði gegn Danmörku í fyrsta leik sínum í Þjóðadeildinni. Það er einhvers konar niðursveifla í gangi. Í þýskum fjölmiðlum er gengið svo langt að tala um stóra krísu og það er jafnframt talað um að leikurinn gegn Íslandi sé leikur sem liðið þurfi gjörsamlega að vinna ef þær ætla sér að komast á Ólympíuleika.

Þjálfarinn í veikindaleyfi og talað um stóra krísu fyrir leikinn gegn Íslandi https://t.co/meirKjIuDe

— Fótbolti.net (@Fotboltinet) September 25, 2023

„Það kemur mér svo lítið á óvart að hún hafi verið svona góð" https://t.co/nmJtjKZvm9

— Fótbolti.net (@Fotboltinet) September 26, 2023

Ísland hefur einu sinni lagt Þjóðverja að velli en það gerðist í Wiesbaden í Þýskalandi árið 2017. Sá leikur endaði með mögnuðum 2-3 sigri Íslendinga. Íslenska kvennalandsliðið hafði ekki skorað gegn Þýskalandi í 30 ár áður en Dagný Brynjarsdóttir braut ísinn í leiknum með marki af stuttu færi á 15. mínútu. Þýskaland jafnaði fyrir hálfleik en Elín Metta Jensen endurheimti forystuna fyrir Ísland með frábæru marki. Dagný skoraði svo sitt annað mark og jók forystu Íslands í 3-1. Þýskaland náði að minnka muninn í lokin og pressaði stíft í blálok leiksins en tókst ekki að jafna. Svo sannarlega einn fræknasti sigur sem íslenskt landslið hefur unnið frá upphafi.

Ég spái því að landsliðsþjálfarinn geri eina breytingu frá leiknum gegn Wales. Sú breyting er varnarsinnuð; að Guðný Árnadóttir komi inn fyrir Diljá Ýr Zomers.

Stjörnuljósmyndarinn Jónína Guðbjörg Guðbjartsdóttir hefur verið dugleg að taka myndir af æfingunum og verður einnig á vellinum í kvöld. Hér eru nokkrar góðar frá æfingunni í gær.

Við á Fótbolta.net höfum verið staðsett í Düsseldorf síðustu daga og höfum mætt á æfingar hjá liðinu þar í borg. Viðtöl hafa birst hér á síðunni en hér fyrir neðan eru tenglar á öll viðtölin sem hafa verið tekin frá því við komum til Þýskalands. Spennt að takast á við Popp og hinar stjörnurnar - „Eru kannski svolítið brotnar" Tók áhættu sem reyndist heillaskref - „Undir mér komið að sýna það" Liðið þurfi að grafa djúpt - „Ég á bara góðar minningar frá 2017" Bryndís hoppaði af gleði - „Ég ætla að sýna mig og sanna" Karólína Lea: Þurfum að vera leiðinlegasta lið í heimi „Þetta er bara nýr leikur og ný saga til að skrifa" Glódís um misskilninginn: Það skipti kannski ekki höfuðmáli Foreldrarnir flugu að austan fyrir stóru stundina - „Alltaf stutt við bakið á mér"

Þetta er í fyrsta sinn þar sem Þjóðadeild kvenna er leikin en Ísland er í A-deild ásamt 15 af hinum sterkustu landsliðum Evrópu. Ísland er í fjögurra liða riðli með Danmörku, Þýskalandi og Wales. Okkar stelpur spila tvisvar við hvert lið, heima og að heiman. Sigurliðið í riðlinum fer í úrslit í febrúar á næsta ári þar sem hægt er að vinna sér inn þann rétt til að spila á Ólympíuleikunum næsta sumar. Liðið í öðru sæti riðilsins heldur sér í A-deild, liðið í þriðja sæti fer í umspil um að halda sæti sínu og liðið í fjórða sæti í riðlinum fellur í B-deild. Að halda sæti sínu í A-deild skiptir miklu máli fyrir undankeppni EM 2025 sem hefst á næsta ári. Því er mikilvægt að ná í góð úrslit í dag.

Stelpurnar byrjuðu nýja keppni, Þjóðadeildina, á sigri gegn Wales síðasta föstudagskvöld. Það var frábært kvöld á Laugardalsvelli en Glódís Perla Viggósdóttir gerði eina mark leiksins eftir hornspyrnu.

???? Sigurmarkið frá því í gær - frábær skalli hjá @glodisperla

???? The winning goal from our match yesterday against Wales. Scored by our captain, Glódís Perla Viggósdóttir.#dottir pic.twitter.com/yfB8jYjSD9

— Knattspyrnusambandið (@footballiceland) September 23, 2023

Og verið velkomin í beina textalýsingu frá Bochum í Þýskalandi. Á eftir spilar Ísland við lið Þýskalands í öðrum leik sínum í Þjóðadeildinni og Fótbolti.net er auðvitað á staðnum.