SKÝRSLAN: Keflavík féll í Úlfarsárdalnum
Hvað réði úrslitum?
Framarar voru bara heilt yfir betri í leiknum. Keflavík fékk sín færi en fóru bara hrikalega illa með þau flest en Framarar náðu í sanngjörn 3 stig þegar öllu er á botninn hvolft.
Bestu leikmenn
1. Breki Baldursson
Breki Baldursson var frábær inn á miðsvæðinu hjá Fram í dag. Er gríðarlega mikilvægur í uppspilinu þeirra upp völlinn og gefur Fred og Tiago frelsi til að leika lausum hala. Skilar mikilli varnarvinnu og hleypur endalaust.
2. Jannik Pohl
Jannik hefði verið augljós maður leiksins en það var oft á tíðum sem hann hefði getað farið mun betur með góðar stöður sem Framarar komu sér í. Það var þó ekki hægt að horfa alveg fram hjá hans frammistöðu í dag þar sem hann skoraði eitt og lagði upp annað og var heilt yfir bara gríðarlega ógnandi fram á við.
Atvikið
Annað mark Framara fór langleiðina með þetta í dag. Keflavík voru nýbúnir að jafna leikinn og það hefði verið auðvelt að fara í panik en þeir gerðu það ekki og voru fljótir að ná forystunni aftur.
Hvað þýða úrslitin?
Keflavík náði ekki að sleppa frá falldraugnum og spilar ekki í deild þeirra bestu á næsta ári. Framarar koma sér í góða stöðu fyrir loka átökin í fallbaráttunni.
Vondur dagur
Oleksii Kovtun var í bölvuðum vandræðum í dag. Var að díla við mjög spræka sóknarmenn Fram og þeir dönsuðu hringi í kring um hann oft á tíðum. Var heppinn að sleppa með spjald í fyrri hálfleik fyrir óþarfa brot en fékk svo gult í seinni.
Dómarinn - 6
Mér fannst margir dómar hjá Guðeiri í dag vægast sagt áhugaverðir. Ég hélt hreinlega að hann hefði gleymt spjöldunum inni í fyrri hálfleik og Keflvíkingar voru heppnir að fara spjaldalausir inn í hálfleikinn. Engar risa ákvarðanir sem hann var með rangar en nokkrar minni sem söfnuðust upp.