SKÝRSLAN: Flautumark á Samsung
Hvað réði úrslitum?
Bæði lið fengu klárlega færi til að klára þennan leik en fremstu mönnum brást heldur betur bogalistin og gekk erfiðlega að klára færin sín. Það var því dæmigert að eina mark leiksins væri fyrirgjöf í uppbótartíma sem lak inn.
Bestu leikmenn
1. Betsy Doon Hassett
Það var fátt um fína drætti í þessum leik verður að segjast og engin sem átti frábæran leik. Betsy fannst mér sprækust þangað til hún var tekin út af og var einhvernveginn líklegust þrátt fyrir að hafa farið illa með góð færi sjálf.
2. Sædís Rún Heiðarsdóttir & Katla Tryggvadóttir
Ég var í smá vandræðum með þennan dálk en þær fá þetta saman í rauninni bara fyrir það að vera báðar ógeðslega góðar í fótbolta. Hvorug átti einhvern stjörnuleik en maður sér samt alltaf þegar maður horfir á þær spila gæðin sem þær búa yfir og þar var engin breyting á í dag.
Atvikið
Sem betur fer fyrir þennan dálk þá kom mark í þetta í lokinn annars hefði dálkurinn örugglega þurft að vera tómur. Markið hennar Mikenna sem var næstum úr síðustu spyrnu tímabilsins bjargaði þessum dálk í dag.
Hvað þýða úrslitin?
Þetta þýðir lítið fyrir bæði lið í ljósi þess að Blikar kláruðu sinn leik. Þróttur skríður fram fyrir Stjörnuna á þessum sigri og enda í 3. sæti á meðan Stjarnan endar í því 4.
Vondur dagur
Jasmín Erla átti hauskúpuleik í dag og var ótrúlega lítið í boltanum. Það gekk lítið upp hjá henni og komst aldrei í takt við leikinn.
Það má líka nefna slútt beggja liða en þetta virtist vera þannig leikur i dag að hægt hefði verið að spila til miðnættis án þess að boltinn færi inn áður en hann slysaðist inn í lokinn.
Dómarinn - 8
Twana var bara með þetta í teskeið fannst mér. Flautaði þegar hann þurfti en annars ekki og lét stúkuna ekki á sig fá þegar hún læt hann heyra það. Hefði mögulega getað lyft rauðu spjaldi á tæklingu í lokinn en eftir að hafa séð það aftur þá var gult spjald hárréttur dómur.