Blikar vinna þennan titil í fyrsta sinn. Lögðu grunninn að honum með frábærum fyrri hálfleik.

Úlfar Hrafn í hörkufæri! Hefði getað jafnað en skot hans yfir. Samherjar hans í teignum vildu fá sendingu.

Ef Valsmenn jafna þá verður farið beint í vítaspyrnukeppni. Engin framlenging.

Fjalar getur haldið leik áfram.

Tafir á leiknum. Elfar Árni var of seinn og keyrði inn í Fjalar Þorgeirsson sem fær nú meðhöndlun sjúkraþjálfara.

Áhorfendur í dag: 384.

Kristinn Jónsson með aukaspyrnu og boltinn á Rohde sem var á fjærstönginni en hitti ekki markið. Seinni hálfleikur verið fremur tíðindalítill miðað við þann fyrri.

Kolbeinn með hörkuskot en vel varið hjá Gunnleifi.

Matthías Guðmundsson með skalla á markið en Gunnleifur varði.

Nú er haglél. Engin sumarstemning.

Seinni hálfleikur hafinn - Ná Valsmenn að snúa þessu við? Blikar verið virkilega góðir í dag og líta vel út.

Hálfleikur - Skítaveður í Garðabænum og leikmenn fegnir að komast inn í hlýjuna. Rigning og rok. Blikar talsvert betri en Valur átti flottan kafla kringum mark sitt.

Guðjón Pétur Lýðsson með fína skottilraun en boltinn naumlega framhjá.

Það hefur bætt í vindinn og í rigninguna um leið.

Valsmenn hafa heldur betur komist inn í leikinn og átt hættulegar sóknir.

Kolbeinn hefur verið funheitur á undirbúningstímabilinu. Annar leikmaður sem hefur verið flottur í vetur er Árni sem skoraði annað mark Blika. Hann átti einmitt marktilraun áðan en boltinn naumlega framhjá.

Þórir Guðjónsson með fyrstu marktilraun Valsmanna, hörkuskot en Gunnleifur varði.

Það er rigning og vindurinn er með Breiðabliki sem hefur verið miklu betra liðið á þessum upphafskafla.

Blikar ógna strax í upphafi en Fjalar Þorgeirsson á tánum í markinu og varði.

Geir Þorsteinsson, formaður KSÍ, er meðal áhorfenda í dag en sessunautur hans er Logi Ólafsson, þjálfari Stjörnunnar.

Aðstoðarvallarþulur í dag er Ólafur Karl Finsen, leikmaður Stjörnunnar. Mun hann veita vallarþulnum góð ráð í dag.

Bæði lið hafa verið flott í síðustu leikjum... augljóst kannski þar sem bæði eru komin í þennan úrslitaleik.

Magnús Már Lúðvíksson og Kristinn Freyr Sigurðsson eru ekki með Val í dag þar sem þeir fengu rautt gegn Stjörnunni. Þá er Bjarni Ólafur Eiríksson einnig fjarri góðu gamni en ekki veit ég ástæðuna fyrir því.

Siggi Dúlla, liðsstjóri Stjörnunnar, og fjórði dómarinn Jóhann Gunnar Guðmundsson ræða málin í kuldanum. Væntanlega að ræða kosningarnar enda mjög pólitískir báðir tveir.

Það gengur á með rigningu, er þokkalegur vindur og nokkuð kalt. Allir ættu þó að lifa af.

Við hliðarlínuna er Björgólfur Takefusa að láta setja rauðar reimar í skó sína. Allir leikmenn munu leika með rauðar reimar til stuðnings Special Olympics á Íslandi.

Íþróttasamband fatlaðra er umsjónaraðili starfs Special Olympics á Íslandi, en alþjóðasamtök Special Olympics standa að verkefninu Laces Campaign, sem byggir á sölu á rauðum reimum með merki Special Olympics og er liður í alþjóðlegu verkefni. Fjölmörg íþróttalið og íþróttafólk úr hinum ýmsu greinum um allan heim hefur stutt verkefnið og tekur Special Olympics á Íslandi nú þátt í fyrsta sinn.

Nú má nálgast byrjunarlið liðanna hér til hliðar.

Komið þið sæl og blessuð. Úrslitaleikur Lengjubikarsins hefst klukkan 16 þegar Breiðablik og Valur eigast við. Fylgst verður grannt með gangi mála í beinni textalýsingu hér á Fótbolta.net.

Valur hefur tvisvar farið með sigur í þessari keppni en Breiðablik hefur ekki náð að hampa þessum titli en hafa þrisvar áður komist alla leið í úrslitaleikinn.

Það eru KR sem eru núverandi handhafar titilsins en þeir lögðu Fram í úrslitaleik á síðasta keppnistímabili.

Breiðablik vann Víking Ólafsvík 2-1 í undanúrslitum keppninnar en Valur vann Stjörnuna 2-1.

Valsmönnum er spáð fimmta sæti á komandi tímabili í Pepsi-deildinni. Ekki hefur verið opinberað í hvaða sæti Blikum er spáð en ljóst er að þeir eru meðal fjögurra efstu liða. Það má því búast við hörkuleik í dag.

Vonandi eru allir búnir að kjósa og við fáum góða mætingu í Garðabæinn í dag.