SKÝRSLAN: Er bara gjörsamlega að leika sér að þessari deild
Hvað réði úrslitum?
Það var ekki mikið sem skildi liðin að í seinni hálfleik en Íslandsmeistararnir sýndu klærnar heldur betur í seinni hálfleiknum og tóku nýliðana í kennslustund. Það er ógnvænleg gæði í þessu Valsliði og Víkingarnir voru slegnir harkalega niður á jörðina.
Bestu leikmenn
1. Amanda Andradóttir (Valur)
Hvað er hægt að segja? Hún er langbesti leikmaðurinn í þessari deild og er bara að leika sér að henni. Eitt mark og fjórar stoðsendingar í dag. Kom alls að sex mörkum Vals. Hvaða rugl er þetta? Hún á bara að vera að spila í einhverju stórliði út í heimi, hún er það góð. Fór beint í lyfjapróf eftir ótrúlega frammistöðu og gat því miður ekki mætt í viðtal eftir þennan leik.
2. Jasmín Erla Ingadóttir (Valur)
Var týnd í fyrra en er búinn að finna sitt rétta andlit aftur í nýju umhverfi. Skoraði tvö í dag og var mjög flott. Samstarf hennar og Amöndu er algjörlega frábært.
Atvikið
Það er klárlega þegar Sigurborg Katla, markvörður Víkinga, þurfti að fara meidd af velli í seinni hálfleik. Víkingar ekki með varamarkvörð og greyið Emma Steinsen þurfti að fara í markið. Leit alls ekki vel út fyrir Víkinga og á í raun ekki að gerast í efstu deild. Leikurinn var búinn á þeim tíma en þetta var atvik sem vakti mikla athygli.
Hvað þýða úrslitin?
Valur er með fullt hús stiga á toppnum á meðan Víkingar eru með fjögur stig eftir þrjá leiki. Þetta var harkaleg lending hjá Víkingum og spurning hvernig þær bregðast við.
Vondur dagur
Það er kannski aumt að setja allt liðið í þennan flokk en Víkingar eiga það bara skilið í dag. Afar vondur dagur hjá öllu Víkingsliðinu sem heild.
Dómarinn - 8
Mér fannst Twana dæma leikinn bara vel og hann var með báða vítaspyrnudómana á hreinu.