Í raun tvíþætt. Víkingur nýtti ekki sín færi sem þær á annað borð sköpuðu sér fyrir utan markið. Hvort heldur sem það var tréverkið, varnarmenn eða Shelby í markinu eða eitthvað annað sem var fyrir þá vildi boltinn ekki inn aftur fyrir þær. Að sama skapi var vinnusemi gestaliðsins til mikillar fyrirmyndar og ekki hægt að segja annað en að þær hafi unnið fyrir sigrinum og vel það. Væri fótbolti sanngjarn væri kannski hægt að færa rök fyrir því að Víkingar hefðu átt skilið að jafna en að því er bara ekki spurt.

Þau eru tvö í þetta sinn. Mark Söndru Maríu var einkar glæsilegt. Fallegt mark og hún heldur bara áfram að skora. Átta mörk í fjórum leikjum er alvöru tölfræði. Einnig verður að nefna sláarskot Bergdísar. Dansaði sig í gegnum alla vörn Þór/KA og kom sér í frábært færi sem hún svo sannarlega verðskuldaði að skora úr en inn vildi boltinn ekki.

Þór/KA fer í níu stig og eltir toppliðin tvö úr þriðja sætinu þremur stigum á eftir þeim. Víkingar falla niður í sjöunda sætið og sitja þar með fjögur stig.

Það er ofboðslega erfitt að ætla að segja vondur dagur um einhverja frammistöðu á vellinum í dag. Allar sem ein voru þær að skila sínu og gera vel að mjög mörgu leyti en lukkan var ekki á allra bandi í dag. Það er einna helst að heimakonur nagi sig í handarbökin fyrir að hafa ekki að minnsta kosti nýtt eitt færi til viðbótar. Segjum því Bergdís fyrir sláarskotið því hún átti það bara skilið að skora úr því færi eftir að hafa böðlast með boltann í gegn.

Ég var lítið að hugsa um ákvarðanir dómarans í dag. Það er yfirleitt gott merki þegar kemur að þeim. Fannst hann hafa fína stjórn á leiknum og skila sínu vel með sínu teymi.