Valsliðið er vél sem mallar áfram, þarf ekkert að vera með einhverjar flugeldasýningar en siglir sínum stigum alltaf í hús. Tindastóll refsaði þeim fyrir að vera seinar í gang í dag en það dugði þó ekki til gæðin í Valsliðinu eru bara slík.

Fyrsta mark leiksins var afar vel tekið hjá Hugrúnu Pálsdóttur. Fær boltann fyrir utan teig og er fljót að hugsa er hún sér Fanneyju illa staðsetta í marki Vals. Lyftir boltanum skemmtilega í markið og leyfði Sauðkræklingum að dreyma í smá stund um þrjú stig heim.

Valur sest eitt á topp deildarinnar með 15 stig að loknum fimm leikjum. Tindastóll enn í fjórða sætinu með sín 6 stig.

Fanney Inga Birkisdóttir fær í annað sinn á tæpri viku á sig mark sem skrifast alfarið á hana. Illa staðsett í markinu og þurfti að horfa á eftir boltanum í netið. Að öðru leyti var hún fín í marki Vals í dag og telst varla eiga vondan dag. En það áttu svo sem fáar á vellinum.

Leikurinn sem slíkur var ekki illa dæmdur í heild en það eru ákveðin atriði sem eftir sitja hjá mér. 84 mínútur hans voru spjaldalausar þrátt fyrir nokkur tilefni til þess að lyfta spjaldi. Í blálok leiks komu svo þrjú spjöld í einni bunu og þarf af tvö sem mér fannst afskaplega soft.