Víkingar léku í nýjum búningum en úrslitin voru þau sömu: Þeir unnu leikinn. Gestirnir voru talsvert betri í leiknum og sköpuðu sér helling af færum og stöðum til að skora enn fleiri mörk. Eru Íslands- og bikarmeistarar að spila gegn nýliðum og það leit þannig út. Vestri átti góða kafla en þeir ákváðu að leggjast ekki í skotgrafirnar í þessum leik. Kannski hefði það verið betri ákvörðun eftir á til að ná jákvæðum úrslitum þó frammistaðan hefði verið jákvæð að mörgu leyti.

Þriðja markið sem kemur rétt fyrir hálfleik. Það kom á versta tíma fyrir Vestramenn og gerir stöðuna þægilega fyrir Víkinga.

Víkingar styrkja stöðu sína á toppnum og eru núna með 18 stig eftir sjö leiki. Hafa svarað tapinu gegn HK afar vel og það er jákvætt að það sé hægt að rúlla svona mikið á liðinu. Breiddin er ógnvænleg þegar Pablo Punyed og Matthías Vilhjálmsson geta bara komið inn af bekknum. Vestri er með sex stig eftir sjö leiki spilaða.

Það er vont fyrir Vestra að geta ekki spilað heimaleiki sína á heimavelli. Þetta er vondur dagur fyrir Ísafjarðarbæ að geta ekki boðið fótboltaliðinu sínu að spila á heimavelli í Bestu deildinni. Mér fannst vængirnir hjá Vestra líka ekki góðir varnarlega og það var mikið spilað á bak við þar. Vantaði meiri liðsheild einhvern veginn í varnarleikinn.

Ekkert rosalega erfiður leikur að dæma, en dómarateymið stóð sig bara vel. Negldu nánast allar ákvarðanir að mínu mati og flæðið var gott. Elmar Atli Garðarsson, fyrirliði Vestra, átti samt að fá gult spjald.