Það var ekki gefið að Stjarnan myndi fara heim með öll stigin í dag. Það var nokkuð jafnræði með liðunum og leikurinn skemmtilegur á að horfa, færi á báða bóga. Eftir að Fylkir minnkaði muninn í 2 - 1 uku þær pressuna og í blálokin má segja að það hafi verið leikklukkan sem réði úrslitum. Það var eiginlega bara tímaspursmál hvenær þær næðu að jafna en leiktíminn var á undan að renna út.

Upphaflega átti leikurinn að fara fram utandyra í stormi sem geysar á höfuðborgarsvæðinu en var fluttur inn í Miðgarð. Breyttum aðstæðum fylgja breytt vandamál. Skömmu fyrir leik heyrði ég á tal boltastelpnanna sem höfðu rekist á mús á vappi um húsið. Þær sáu músagildru en völdu sjálfar að loka henni, enda vildu þær ekki vinna músinni mein. Gæðablóð í Garðabænum.

Nú er þriðjungur búinn af venjulegu 18 leikja mótinu áður en farið verður í tvískiptinguna. Liðin fara nú í langt landsleikjahlé áður en haldið verður af stað að nýju. Þetta er því ágætis tími til að telja aðeins upp úr pokunum og sjá hver uppskeran hefur orðið. Úr leikjunum sex er Stjarnan búinn að ná í helming mögulegra stiga, 9 stig af 18 mögulegum og sigla upp töfluna með sínum öðrum sigri í röð. Ljúka kvöldinu í 4. sæti. Gestirnir í Fylki eru í þriðja neðsta sæti með 5 stig.

Ég velti fyrir mér hvort ég ætti að tala um aðstæður í þessum lið og get eiginlega ekki setið á mér. Það var vitað alla vikuna að von væri á stormi, sumum leikjum var frestað en eftir stóð þessi leikur og toppslagur deildarinnar. Þrjóskast var við með báða leikina og á endanu þótti gæfulegra að færa þennan inn í hús. Af tvennu illu er að sjálfsögðu betra að spila inni en úti í snarvitlausu veðri eins og gert var með viðureign Breiðabliks og Vals. Hinsvegar hlýtur að vera hægt að finna aðrar lausnir en að spila sumarleik inni í fótboltahúsi. ÍTF og félögin hljóta að vilja selja betri vöru en það.

Toppdagur hjá Jens Elvari og teyminu hans í dag en ekki mikið um erfið atvik. Fær því góða einkunn fyrir frammistöðuna í dag. En hann þarf samt að fá hrós sem nær út fyrir þennan eina leik. Það er stöðugt verið að reyna að fá fólk til að koma inn í dómgæsluna og gengur misvel. Jens Elvar Sævarsson er með gríðarlega reynslu sem fótboltamaður og á að baki fjölda leikja í efstu deild auk þess að hafa spilað með yngri landsliðum þjóðarinnar. Að fá svona reynslubolta í dómgæsluna er hvalreki og góð fyrirmynd fyrir aðra sem velta fyrir sér hvort það sé til líf eftir fótboltann. Fyrir það fær hann stóra hrósið!