SKÝRSLAN: Jafnteflin hrúgast inn hjá Grindavík
Hvað réði úrslitum?
Tvennt sem ræður þar úrslitum. Færanýting Keflavíkur er annað atriðið. Sköpuðu sér nokkur ágætis færi til þess að drepa leikinn sem ekki nýttust. Þeim var svo refsað fyrir það af Grindvíkingum sem lögðu aldrei árar í bát og héldu áfram að reyna og uppskáru að lokum þó leikur þeirra hafi eflaust ekki verið sá besti.
Bestu leikmenn
1. Stefán Jón Friðriksson
Stefán er að heilla mig á miðju Keflavíkur og mér fannst hann flottur í kvöld. Skoraði þess utan gott mark. Kraftmikill og duglegur og komst vel frá sínu
2. Christian Bjarmi Alexandersson
Gaman að sjá unga leikmenn skina. Annan leikinn í röð fær Christian Bjarmi að byrja og stóð sig virkilega vel. Ekkert sjálfgefið fyrir 17 ára gutta að koma inn í byrjunarliðið og standa sig með slíkum sóma.
Atvikið
Ætli það verði ekki að vera jöfnunarmarkið. Það var ekkert endilega í kortunum að Grindavík væri að fara að jafna þennan leik og þeir þurftu að grafa djúpt eftir markinu, Það kom þó á endanum. Það sem gerir það kannski meira að atviki kvöldsins er að aðeins örfáum mínútum áður hafði Mamadou Diaw brennt af sannkölluðu dauðafæri þegar hann átti hreinlega að klára leikinn.
Hvað þýða úrslitin?
Grindavík fellur niður um tvö sæti eftir sigra Aftureldingar og Þróttar og situr í 11.sæti deildarinnar með fjögur stig. Keflavík tekur smá stökk og fer úr áttunda sætinu í það fimmta með fimm stig.
Vondur dagur
Mamadou Diaw fyrir að brenna af sannkölluðu dauðafæri á lykilaugnabliki í leiknum. Hefði getað klárað þennan leik og tryggt sínu liði þrjú stig. Sá nagar sig í handarbökin á heimleiðinni og mun eflaust ekki sofa vel í nótt
Dómarinn - 9
Frábær leikur hjá Helga og teyminu frá mínum bæjardyrum séð. Leyfði leiknum að fljóta þegar við átti og hélt góðri stjórn í 90 mínútur. Vel gert þar.