SKÝRSLAN: Rothögg eftir 17 mínútur
Hvað réði úrslitum?
Breiðablik er á miklu flugi og þær byrjuðu leikinn frábærlega. Þær komust í 3-0 eftir 17 mínútur og það var rothögg. Keflvíkingar reyndu sitt besta til að standa upp aftur en gegn eins góðu liði og Breiðabliki er það er erfitt, nánast ómögulegt, þegar þú byrjar svona illa.
Bestu leikmenn
1. Katrín Ásbjörnsdóttir (Breiðablik)
Er að komast aftur á fleygiferð eftir meiðsli. Skorar tvö í dag og var óheppin að gera ekki þrennuna.
2. Írena Héðinsdóttir Gonzalez (Breiðablik)
Fékk tækifærið og tók það vel. Tók fjölmargar hornspyrnur og þær voru allar stórhættulegar. Engin Agla María og það var ekkert vandamál í dag. Hrafnhildur Ása er líka nefnd hérna en það er virkilega hæfileikaríkur leikmaður.
Atvikið
Vítaspyrnan sem Breiðablik fær gengur endanlega frá þessum leik. Þessi dómur vakti ekki mikla ánægju hjá Jonathan Glenn, þjálfara Keflavíkur og hans teymi, en mér persónulega fannst það réttur dómur - allavega frá mínu sjónarhorni.
Hvað þýða úrslitin?
Breiðablik vinnur bara og vinnur. Sigurtilfinningin er sterk í Kópavoginum þessar mundir. Þær eru núna komnar í undanúrslit þar sem þær mæta Þór/KA. Keflavík er úr leik og fókusinn fer núna á deildina.
Vondur dagur
Byrjunin hjá Keflavík var afskaplega vond. Þú getur ekki mætt svona til leiks gegn Breiðabliki á Kópavogsvelli. Það er bara ekki boðlegt. Caroline Van Slambrouck og Marín Rún Guðmundsdóttir fengu báðar höfuðhögg en vonandi er allt í lagi með þær.
Dómarinn - 7
Fínn leikur hjá Gunnari Oddi og hans teymi. Vítaspyrnan sem Breiðablik fær er rétt að mínu mati þá þjálfarateymi Keflavíkur hafi ekki verið sátt. Mér fannst vítaspyrnan sem Keflavík fékk öllu vafasamari en hún hafði engin úrslitaáahrif, bara sárabót.