SKÝRSLAN: Markvarðaveisla í Lautinni
Hvað réði úrslitum?
Bæði lið fengu nóg af færum og voru markmenn beggja liða á sínum degi. Leikurinn hefði auðveldlega getað dottið báðum megin en Fylkismenn voru klínískari. Vestri sóttu mikið undir lokin í stöðunni 3-2 og sagði Davíð Smári í viðtali eftir leik að hefði leikurinn verið 5 mínútum lengur hefðu þeir fengið eitthvað út úr leiknum, þar get ég ekki verið ósammála. En eins og þeir segja ef og myndi.
Bestu leikmenn
1. Ólafur Kristófer Helgason
Ólafur átti úrslitavörslur í stöðunni 3-2, ótrúleg tvöföld varsla sem skilaði stigunum þremur í Árbæinn.
2. Nikulás Val Gunnarsson
Nikulás var góður í dag, óheppinn að skora ekki er það var bjargað á línu frá honum. Frábær stoðsending í þriðja marki Fylkis.
Atvikið
Tvöfalda varsla Ólafs Kristófers undir lok leiks var mögnuð. Allur meðbyr með Vestra en Ólafur læsti búrinu.
Hvað þýða úrslitin?
Fylkismenn fara úr neðsta sæti og upp í það ellefta.
Vestri er í 10. sæti deildarinnar með 10 stig.
Vondur dagur
Jeppe Gertsen sem var nýbúinn að skora gullfallegt mark og komst svo í frábært færi til að jafna leikinn en lét Ólaf verja frá sér. Góð varsla en þarna set ég kröfu á Jeppe að skora úr þessu færi.
Einnig er vert að minnast á Morten Hansen sem kom inn frá bekknum og inn í hjarta varnarlínu Vestra og 20 sekúndum síðar fengu Vestri mark á sig. Morten átti enga beina sök í markinu en ekki beinlínis draumainnkoma.
Dómarinn - 4
Línan hjá Arnari Þór stórskrýtin að mínu mati, þá sérstaklega með spjöldin. Spurning með rangstöðu í þriðja marki Fylkis.
Þeir sleppa við falleinkunn vegna stóru ákvarðanna þar sem var réttilega dæmt (eða ekki dæmt) rangstöðumark og möguleg vítaspyrna.