SKÝRSLAN: Loksins vinna FH-ingar
Hvað réði úrslitum?
Í hreinskilni sagt þá var þetta bara algjörlega gæðalaus leikur í svona 70 mínútur. FH-ingar skora fínt mark í fyrri hálfleik en annars gerist bara voðalega lítið báðumegin. Það kemur svo smá móment með Fylki þegar þeir jafna með frábæru skoti en FH-ingar virtust vakna við það og keyrðu svo á þá og gerðu út um leikinn.
Bestu leikmenn
1. Sindri Kristinn Ólafsson (FH)
Ef ekki hefði verið fyrir Sindra þá er mjög líklegt að úrslitin hefðu verið öðruvísi. Hann á nokkrar mjög góðar vörslur í leiknum og sérstaklega þegar hann vera tvívegis frá stuttu færi á 65. mínútu. Ég skrifa markið sem Fylkir skorar ekki á hann heldur var það bara frábært skot.
2. Kjartan Kári Halldórsson (FH)
Þegar FH-ingar voru algjörlega líflausir í sóknarleik sínum þá var Kjartan svona eini með lífsmark. Þegar þeir vakna svo loksins þá skorar Kjartan gott mark og svona heilt yfir var hann besti sóknarmaður liðsins í dag.
Atvikið
Mark Fylkismanna var rosalega flott. Arnór Breki Ásþórsson fær boltan alveg vel fyrir utan teig FH-inga og svo þrumar hann boltanum svakalega fast í fjærhornið, vel gert.
Hvað þýða úrslitin?
FH-ingar sækja sinn fyrsta sigur síðan 4. maí. Þeir fara þá upp í 5. sæti deildarinnar með 17 stig. Fylkismenn fara á botninn með þessu tapi þar sem KA vann í dag og fer upp fyrir þá.
Vondur dagur
Næstum hver og einn einasti maður inn á vellinum u.þ.b. fyrstu 70 mínúturnar í leiknum. Gæðaleysið var svakalegt, það var næstum bara erfitt að halda sér vakandi. Sem betur fer fengum við frekar skemmtilegar loka 20 mínútur.
Dómarinn - 9
Erlendur Eiríksson og hans teymi eiga bara frekar auðveldan leik. Það var ekki mikið af stórum atvikum sem þurfti að taka á nema kannski mark sem FH skorar á 19. mínútu en fá ekki því Vuk rekur hendina í boltan. Það er held ég rétt dæmt.