Það er nokkuð ljóst að Valsliðið lenti í álagsprófun, hvernig myndu þeir bregðast við þegar það reyndi á leikmannahópinn og fengu falleinkunn. Gylfi Þór Sigurðsson og Aron Jóhannsson eru meiddir, Hólmar Örn Eyjólfsson í leikbanni. Þeir byrjuðu leikinn frábærlega en það fór heldur betur að halla undan fæti þegar Orri Sigurður Ómarsson og Jónatan Ingi Jónsson fóru meiddir af velli. Þá áttu Skagamenn leikinn að mestu fyrir utan kafla í byrjun seinni hálfleiks. Að horfa á spilamennsku ÍA þegar þeir voru búnir að átta sig á því að þeir gætu vel unnið þennan leik var frábært. Þeir spiluðu eins og stríðsmenn, börðust fyrir hvorn annan og létu sig vaða í að verja markið sitt.

Stóra atvikið sem allir eru að tala um eftir þennan leik er glæsilmarkið sem tryggði sigurinn. Steinar Þorsteinsson var mættur til leiks í dag á bleikum skóm sem var torsótt að fá heimild fyrir hjá þjálfaranum. Það hafðist þó með því að lofa mörkum og þetta þvílíka gull af marki. Viktor Jónsson sendi boltann út úr teignum á Steinar sem tók bananabolta á fjær beint í bláhornið. Bæng og mark!

Í 27 leikja móti skiptir í raun engu stórmáli þó svo lið tapi einum og einum leik. Valur var bara að tapa öðrum leik sínum á tímabilinu og er enn fimm stigum frá toppsætinu. Þeir eiga eftir að mæta toppliði Víkings tvisvar. Hvað ÍA varðar þá eru þeir í hörkubaráttu um fjórða sætið og á meðan FH vann Breiðablik á sama tíma í kvöld var gríðarlega mikilvægt fyrir ÍA að vinna sinn leik og halda 4. sætinu. Það gæti skýrst strax í næstu viku hvort 4. sætið verði ekki Evrópu sæti á næstu leiktíð og þar vilja öll lið vera. En til að gera þetta aðeins rómantískara fyrir ÍA þá eiga þeir leik til góða á Val sem er 5 stigum fyrir ofan þá í 3. sætinu.

Arnar Grétarsson þjálfari Vals fær þennan lið í dag fyrir að yfirgefa svæðið áður en allir fjölmiðlar fengu að taka við hann viðtöl eftir leik. Hann ræddi við rétthafann, Sýn, en Fótbolti.net og Morgunblaðið sátu eftir með engin viðbrögð frá þjálfara liðsins sem lét sig hverfa. Fyrir 10 árum síðan voru 7 fjölmiðlar sem mættu á hvern einasta leik í efstu-deild karla, fjölluðu um leikina og tóku eftir þá viðtöl. Í dag eru þetta þrír fjölmiðlar og sumir þeirra fjalla ekki einu sinni um alla leiki. Umfjöllun fer minnkandi og menn verða að vera meðvitaðir um að hún er ekki sjálfgefin, menn verða að spila saman fótboltanum til heilla. Valsmenn fóru mikinn fyrir mót og ætluðu að breyta leiknum með fjölmiðlum, héldu fréttamannafundi og báðu fjölmiðlamenn að spila með sem og við gerðum. Það þýðir ekki að hlaupa í felur þegar það dettur inn einstaka tapleikur. Á meðal lesenda Fótbolta.net og Morgunblaðsins er fjöldi stuðningsmanna Vals sem vildu einmitt fá viðbrögð þjálfara síns eftir þetta tap. Ef Valsmönnum er alvara með að lyfta umræðunni þá taka þeir þetta til sín. Ég verð allavega mættur á Hlíðarenda í hádeginu á morgun og tilbúinn að taka þetta viðtal ef það verður í boði.

Mér finnst hafa verið alltof mörg atvik hjá dómurum í sumar þar sem dómari dæmir eitthvað sem bara átti sér ekki stað. Ef þið eruð ekki vissir, leyfið þá sóknarmönnum að njóta vafans, ekki giska. Atvikið sem ég vísa til núna var á 6. mínútu leiksins þegar Jónatan Ingi Jónsson þrumaði í Patrick Pedersen liðsfélaga sinn og þaðan fór boltinn í markið. Helgi Mikael dæmdi mark, Valsmenn fögnuðu markinu og allt var eðlilegt þangað til.... Þórður Arnar Árnason dómari hafði grun um að hann hafi séð einhvern rangstæðan og markið var dæmt af. Patrick var ekki rangstæður, Guðmundur Andri Tryggvason sem var fyrir innan hafði engin áhrif á leikinn. Hreinlega röng ákvörðun hjá Þórði. Þar fyrir utan fannst mér stundum vanta samræmi á milli liðanna í dómgæslunni. Það verður að dæma jafnt í báðar áttir.