Langbesta frammistaða Vestra á nýlögðum heimavelli eftir tvö slæm töp að undanförnu. Blikar virtust ætla að vinna þennan leik með lágmarks áreynslu og náðu ekki ná að komast í alvöru takt þegar þeir þurftu.

Vítaspyrnan sem var dæmd á Vestra. Viktor Karl er búinn að missa boltann en Tarik setur hönd á bak hans og Viktor fellur við. Var afar strangur dómur og ekki í takt við línuna sem var í leiknum þegar þetta gerðist.

Vestri eru enn í fallsæti en jafna KA að stigum sem eiga þó leik til góða. Blikar eru nú með jafnmarga leiki og Víkingur og eru 6 stigum á eftir þeim. Það er erfitt að elta Víkingana þegar þeir eru ekki að taka 3 stig úr svona leikjum.

Ég varð fyrir miklum vonbrigðum með Blikaliðið í dag. Þeir sköpuðu sér afar lítið, hreyfðu boltann hægt og þeir náðu ekki upp mikilli pressu. Ég held að ég hafi séð Patrik Johannesen á boltanum í fyrsta skipti þegar hann tók skot úr aukaspyrnu á 45. mínútu. Þeirra fremstu menn verða að taka meiri ábyrgð og draga eitthvað upp úr hattinum þegar illa gengur.

Ívar Orri byrjaði þennan leik vel og leyfði leiknum að fljóta. Svo dæmdi hann þessa vítaspyrnu og skipti algerlega um línu og fór að dæma í hvert skipti sem einhver kenndi sér mein. Mér fannst þessi vítaspyrna ansi harður dómur en dæmi hver fyrir sig.