SKÝRSLAN: Hvor er hvað í Keflavík?
Hvað réði úrslitum?
Þetta eina skot sem rataði á markið réði öllu í dag. Leikurinn var auðsjáanlega báðum liðum mikilvægur og liðin ekki á því að gefa nein færi á sér. Fótbolti er þó íþrótt augnabliksins og eitt slíkt átti Eva Lind Daníelsdóttir þegar hún skoraði eina mark leiksins með glæsilegu skoti sem söng í netinu,
Bestu leikmenn
1. Eva Lind Daníelsdóttir
Skoraði markið sem skildi liðin að og átti auk þess flotta frammistöðu í öftustu línu Keflavíkur, skilaði boltanum vel frá sér og barðist vel fyrir liðið.
2. Aníta Lind Daníelsdóttir
Eva Lind gæti allt eins átt öll góðu augnablikin sem Aníta átti í leiknum eða öfugt. Stundum var ég einfaldlega ekki viss um hvor þeirra það væri. Heyrði á vellinum að það væri ekkert nýtt að fólk ætti til að vera í basli að þekkja þær í sundur á velli. Að öllu gamni slepptu þó áttu systurnar báðar prýðisdag í liði Keflavíkur og skiluðu góðu verki og þremur stigum í hús.
Atvikið
Auðvitað markið. Uppi var reikistefna í blaðamannaboxinu um stund hvor systirin væri að verki en Aníta hefur verið þekkt fyrir alvöru skotfót. Þar er þó um að ræða vinstri fót og þar sem markið var skorað með hægri var svarið auðfundið.
Hvað þýða úrslitin?
Keflavík og Fylkir hafa sætaskipti við botn deildarinnar. Keflavík fer í níu stig í níunda sætið en Fylkir fast á sex stigum á botninum. Botnslagurinn tekur því að harðna en Þróttur situr í áttunda sætinu með 10 stig.
Vondur dagur
Í raun sóknarleikur beggja liða nokkuð heilt yfir. Leikurinn varð aldrei fjörugur og færin voru svo sannarlega langt frá því að vera mörg. Undirstrikar eflaust mikilvægi leiksins að liðin voru ekki að taka neina sénsa framar á vellinum og úr varð heldur hægur leikur.
Dómarinn - 8
Ekkert upp á teymið að kvarta. Það var tekist á og spjöld voru gefin. Öll rétt frá mínum bæjardyrum séð.