Þetta var jafn leikur en bæði lið áttu í ákveðnum vandræðum með að skapa opin marktækifæri. Mörkin koma bæði bara upp úr mistökum, KA menn dekka ekki nógu vel úr horni sem er mistök, dómararnir dæma markið ekki af sem var mistök og Sindri Kristinn gefur KA víti seint í leiknum sem er mistök.

Vítaspyrnan sem KA fær. Hallgrímur Mar er sloppinn einn gegn markmanni. Sindri markvörður FH kemur þá vel út á móti honum og Hallgrímur er mjög klókur. Hann lyftir boltanum bara yfir Sindra, fær snertinguna, fer niður og fær vítið sem jafnar leikinn.

KA menn eru enn í 10. sæti en eru komnir stigi frá fallsæti þar sem Vestri sitja sætinu fyrir neðan þá. KA fer einmitt vestur næst og mætir þeim, sem verður áhugaverður leikur. FH-ingar eru enn í 5. sæti, nú með 21 stig, tveimur stigum á eftir ÍA í 4. sæti.

Sindri Kristinn Ólafsson markvörður FH hefur verið að stíga upp nýlega og verið drjúgur í að bæta við stigum í Hafnarfjörðinn. Í dag kostaði hann hinsvegar liðið 2 stig þegar hann gefur KA vítaspyrnu og ég þykist vita að hann er sjálfur ósáttastur við sjálfan sig.

Arnar Þór er ekki með marga leiki í efstu deild og það sást kannski aðeins í dag. Fyrsta markið á náttúrulega ekki að standa og svo var full mikið af litlum hlutum sem hefðu mátt fara betur. Línan var svolítið að sveiflast til og frá, og svo fóru líkast til full mörg spjöld á loft. Við viljum hinsvegar fleiri dómara sem geta tekið leiki í efstu deild og vonandi var þetta bara off dagur hjá honum og hans teymi.