Styttist í þetta Liðin eru að rölta til vallar og styttist í upphafsflautið.

Við hverju má búast? Liðin hafa ekki mæst oft í gegnum tíðina og sjaldan verið saman í deild, seinast gerðist það árið 1998 er bæði lið voru í efstu deild en þá sótti ÍR fjögur stig í tveimur viðureignum þeirra. Alls hafa þau mæst sextán sinnum, ÍR hefur unnið fimm sinnum, þrisvar sinnum hafa liðin skilið jöfn og átta sinnum hefur Grindavík unnið.

Fyrri leikur liðanna í ár lauk með 1-1 jafntefli en þá jafnaði ÍR undir lokin með marki frá Braga Karli Bjarkasyni. Einn eftirminnilegasti leikur liðanna er líklega bikarleikur liðanna árið 2022 í 32-liða úrslitum en þar fór ÍR með sigur úr býtum en lesa má um leikinn hér

ÍR ÍR-ingar eru eitt af spútnikliðum deildarinnar til þessa en nýliðarnir sitja nú í 5. sæti og eru búnir að hala inn sextán stigum sem er betra en margir bjuggust við, þó að undirritaður sé nú vissulega ekki með hökuna í gólfinu. Liðið er á góðu skriði og er búið að sækja tíu stig í seinustu fjórum en seinast sigraði liðið Aftureldingu, 3-0, þar sem Bragi Karl Bjarkason, markahæsti maður deildarinnar, skoraði sitt sjöunda mark í sumar.

Grindavík Eftir nokkuð hæga byrjun sem endaði með því að Brynjar Björn Gunnarsson var vikið úr starfi án sigurs hafa Grindvíkingar sótt í sig veðrið og sitja í dag í fjórða sæti deildarinnar með stigi meira en heimamenn. Halli Hróðmars hefur farið vel af stað með liðið og ætlar sér klárlega að halda því áfram með því að sækja önnur þrjú stig hér í kvöld.

Velkominn í Mjóddina! Komiði sæl og blessuð og verið velkominn í Suður Mjódd, hér fer fram textalýsing frá sex stiga slag ÍR og Grindavíkur.