SKÝRSLAN: KA pakkaði Vestra saman fyrir vestan
Hvað réði úrslitum?
Gæðin og reynslan í KA liðinu. Voru mikið betur stemmdir í þessum leik. Sýndu lítið fram að fyrsta markinu en tóku leikinn yfir í seinni hálfleik. Gáfu fá færi á sér og sköpuðu fín færi þrátt fyrir að vera með vindinn í andlitið
Bestu leikmenn
1. Hallgrímur Mar Steingrímsson
Skorar tvö mörk í dag og átti flottan dag í fremstu víglínu.
2. Daníel Hafsteinsson
Frábær á miðjunni í dag ásamt Bjarna. Fann flottar sendingar trekk í trekk og sýndi gæðin sín
Atvikið
Rauðu spjöldin í lokin. Faitai virtist sparka eitthvað aðeins frá sér en ekkert það alvarlegt. Hann er þekkt ljúfmenni fyrir vestan og hefur ekkert illt í sér. Sama má segja um Jón Hálfdán, sagði lítið og ekkert dónalegt. Mátti sleppa þessu
Hvað þýða úrslitin?
Vestri er í alvöru brasi. 1 stig úr 4 heimaleikjum í röð er óboðlegur árangur og það þarf eitthvað mikið að breytast svo að liðið hífi sig úr fallbaráttunni. Það er aðra sögu að segja af KA mönnum, frábærir í dag og komnir í úrslit í bikar. Bjart yfir Eyjafirðinum
Vondur dagur
Það er hægt að týna til flestalla leikmenn Vestra hér en ég ætla að setja þetta á Pétur Bjarnason bara til að skrifa eitthvað. Í svona leik spilandi upp í vindinn þarft þú sem framherji að hlaupa af þér skóna og vinna návígi en það gerðist ekki í dag, enda tekinn út af í hálfleik
Dómarinn - 8
Helgi var bara fínn í dag. Öll spjaldaflóran átti rétt á sér en rauðu spjöldin voru nokkuð hörð. Hefði mátt taka betur og fyrr á silaskapnum í KA mönnum. Erfiður leikur að dæma og hann stóð sig vel