Styttist Þá ganga liðin til vallar og gera sig klár í slaginn.

Við fengum þetta veður bara! Það er sól og blíða, algjört logn og frábær andi í Árbænum.

Þetta ætti að vera frábær fótboltaleikur!

Byrjunarliðstíðindi! Rúnar Páll, þjálfari Fylkis, gerir þrjár breytingar á Fylkisliðinu frá Valsleiknum sem þeir töpuðu 4-0 í seinustu umferð. Sigurbergur Áki Jörundsson, Guðmundur Tyrfingsson og Halldór Jón Sigurður Þórðarson koma inn í liðið fyrir þá Ásgeir Eyþórsson, Þóroddur Víkingsson og Benedikt Daríus Garðarsson.

Jón Þór Hauksson, þjálfari ÍA gerir eina breytingu á sínu liði frá seinasta leik Skagamanna sem þeir unnu sannfærandi 8-0 gegn HK. Hlynur Sævar Jónsson kemur inn í liðið fyrir Hilmar Elís Hilmarsson.

Við fengum spá! Hinn mikli Þórsari og lífskúnstner, Sæbjörn Þór Steinke, fékk það erfiða en þó skemmtilega verkefni að spá í þennan áhugaverða leik í kvöld. Um leikinn hafði hann eftirfarandi að segja:

Fylkir 1-2 ÍA
Hörkuleikur í dag þar sem ÍA er sigurstranglegra liðið. Þórður Gunnar skorar mark Fylkis, jafnar í 1-1 eftir mark frá Arnóri Smárasyni en það verður svo Viktor Jóns sem klárar dæmið fyrir ÍA.

Mættust í höllinni Liðin hafa mæst einu sinni áður í sumar í deildinni. Þá var Akranesvöllurinn ekki tilbúinn og leikurinn spilaður inni í Akraneshöllinni. Skagamenn unnu 5-1 sigur en Orri Sveinn, varnarmaður Fylkis, fékk rautt spjald í fyrri hálfleiknum.

Tölfræði úr leikjunum:
Leikir: 52
Fylkissigrar: 14
Jafntefli: 13
Skagasigrar: 25
Markatalan: Fylkir 72-99 ÍA

Þriðja liðið Jóhann Ingi fær það skemmtilega verkefni að dæma þennan leik í kvöld en honum til halds og trausts verða þeir Gylfi Már Sigurðsson og Eysteinn Hrafnkelsson. Twana Khalid Ahmed er skiltadómari og eftirlitsmaður KSÍ er Eyjólfur Ólafsson.

Neðstir í deildinni og breytingar í þjálfarateyminu Fylkisliðið styrkti sig ekkert gífurlega mikið fyrir tímabilið og lang flestir sérfræðingar Bestu deildarinnar spáðu Fylkisliðinu falli. Í dag eru þeir neðstir í deildinni. Það lítur allt út fyrir að þetta gæti orðið tímabil sem Árbæjingar vilja gleyma sem fyrst. Einu sigrarnir hjá Fylki í ár hafa komið á móti neðstu tveimur liðunum fyrir utan þá, HK og Vestra. Þeir koma klárlega sem 'underdogs' inn í þennan leik í kvöld.


Nýr aðstoðarþjálfari
Brynjar Björn Gunnarsson hefur verið ráðinn aðstoðarþjálfari Fylkis út tímabilið hið minnsta. Hann mun aðstoða Rúnar Pál Sigmundsson. Olgeir Sigurgeirsson hefur gengt stöðunni undanfarin ár en var rekinn frá félaginu á dögunum þrátt fyrir andstöðu Rúnars Páls.

Evrópuandi á Skaganum Skagamenn eru í alvöru gír þessa stundina en þeir eru heitasta lið deildarinnar með 13 stig í seinustu 5 leikjum. Þeir koma úr hreint út sagt mögnuðum leik gegn HK á Írskum dögum sem þeir tóku sannfærandi 8-0 en þar skoraði Viktor Jóns hvorki meira né minna en 4 mörk en hann er markahæsti leikmaður deildarinnar til þessa með 12 mörk.


Hvernig klára þeir tímabilið?
Líkt og áður kom fram er ÍA heitasta lið deildarinnar og sitja í 4. sætinu. Þeir eru fjórum stigum á eftir Breiðablik en eiga leik til góða. Þetta er ekkert flóknara en það að Skagamenn eru komnir í Evrópubaráttu þar sem þeir eru að berjast um efstu sætin við bestu liðin í deildinni. Spurningin er bara hvort þeir nái að halda þetta út.

Sú lang Besta! Heilir og sælir ágætu lesendur og veriði hjartanlega velkomin í þessa þráðbeinu textalýsingu frá leik Fylkis og ÍA í Bestu deild karla úr Árbænum.