SKÝRSLAN: Kærkominn sigur
Hvað réði úrslitum?
Þetta var án efa leikur tveggja hálfleika þar sem Fylkismenn voru betri í fyrri hálfleik og voru 2-0 yfir í hálfleik, verðskuldað. Skagamenn komu mikið betri út í seinni hálfleikinn og settu strax tóninn með alvöru færum og sóknarpressum. Hins vegar nægði það ekki í kvöld og einhvernveginn héldu Fylkismenn þetta út. Hvernig skil ég ekki.
Bestu leikmenn
1. Ómar Björn Stefánsson
Býr til þriðja markið með geggjaðri sendingu og klárar síðan gífurlega vel. Alltaf ógn í kringum hann og hann var líflegur í kvöld.
2. Orri Sveinn Segatta
Veit ekki hversu mörg návígi hann vann í dag en hann var gjörsamlega geggjaður í hjartanu. Hjálpaði Fylkisliðinu helling að halda hreinu í kvöld!
Atvikið
Þegar Aron Snær gulltryggði sigurinn fyrir Árbæinga undir lok leiks. Skagamenn voru búnir að liggja á þeim allan seinni hálfleikinn og það var kærkomið fyrir Fylkismenn að sjá boltann í netinu.
Hvað þýða úrslitin?
Með sigrinum í kvöld spyrna Fylkismenn sér frá botninum og senda Vestramenn á botninn á markatölu. Skagamenn detta niður í 5. sætið þar sem FH-ingar unnu HK á heimavelli í kvöld.
Vondur dagur
Árni Marínó gerði sig sekan um klaufaleg mistök í öðru marki Fylkis í dag þegar hann hrasar í teignum og gefur Orra frían skalla. Rándýrt. Annars var bara allt Skagaliðið ekkert sérstakt í kvöld.
Dómarinn - 8
Ekkert sem ég get sett út á Jóhann og hans teymi í dag. Bara mjög góður leikur hjá þeim, öll spjöld voru hárrétt og stóru ákvarðanirnar geirnelgdar að mínu mati.