SKÝRSLAN: Valsmenn slátruðu Albönunum í Shköder
Hvað réði úrslitum?
Valsliðið mætti í sínum besta gír út í fyrri hálfleikinn og svo gott sem kláraði leikinn þar, 3-0 í hálfleik. Í þeim seinni drápu þeir svo leikinn og settu eins litla orku og mögulegt var í hann.
Bestu leikmenn
1. Gylfi Sigurðsson (Valur)
Maður einfaldlega fær ekki nóg, gæðin sem hann býr yfir eru ótrúleg.
2. Hólmar Örn Eyjólfsson(Valur)
Var alltaf rétt staðsettur og varðist öllum mögulegum sóknarlotum gestanna af stakri snilld meðan hans naut við á vellinum.
Atvikið
Fjórða markið, Valur hafði lagst djúpt og farið í það að drepa leikinn af snilld, Gylfi fékk þá sendingu inn á miðjuna frá Jónatan og Gylfi smellti boltanum í fyrsta bakvið varnarlínu Vllaznia beint í hlaupaleiðina hjá Tryggva sem stakk alla af og vippaði svo yfir Qarri í markinu. Það endanlega kláraði þennan leik.
Hvað þýða úrslitin?
Valur mætir St. Mirren í Skotlandi í næstu umferð, Vllaznia er úr leik.
Vondur dagur
Milos Stojanovic var afleitur og gerði stór mistök í þriðja marki Vals sem svo gott sem fór með leikinn.
Dómarinn - 9
Sozza og hans teymi flott, gat ekki séð ein einustu mistök í þessu, en að vissu leyti frekar auðveldur leikur að dæma, sérstaklega miðað við fyrri leikinn.