Keflvíkingar tóku forystuna snemma leiks og gerðu vel í að halda það út. Gunnlaugur Fannar fær auðvitað rautt spjald undir lok fyrri hálfleiks en ÍR-ingar fóru illa að ráði sínu í seinni hálfleik og náðu aldrei að koma boltanum yfir línúna. Lélegar ákvarðanatökur á seinasta þriðjung vallarins urðu ÍR-ingum að falli í seinni hálfleik, og jafnvel í þeim fyrri líka.

Það er auðvitað alltaf hægt að velja sigurmarkið en ég myndi klárlega velja rauða spjaldið á Gunnlaug Fannar. Glórulaust hjá varnarmanninum. Galið olnbogaskot sem á ekki heima inni á fótboltavellinum.

Keflvíkingar minnka muninn í ÍR í eitt stig á fara upp í 5. sætið í bili. Þetta var einnig fyrsta tap ÍR-inga á heimavelli í sumar.

Leikurinn í kvöld var keimlíkur leik ÍR gegn Njarðvík um daginn. ÍR-ingar komu sér oft í góðar stöður ofarlega á vellinum en lélegar ákvarðanatökur urðu Breiðhyltingum að falli.

Mér fannst línan ekkert eðlilega óskýr í kvöld hjá Twana og teyminu. Ég er kannski ekki hlutlaus en það voru svo ótrúlega margir dómar sem ég var svo ótrúlega ósammála í báðar áttir. Rauða spjaldið var hins vegar rétt en eins og ég segi; línan var eins óskýr og hún gat verið, það var ekkert flæði í leiknum og hann var með enga stjórn á honum.