SKÝRSLAN: Leystist upp í vitleysu undir restina í Njarðvík
Hvað réði úrslitum?
Gríðarlega taktískur leikur þar sem bæði lið gáfu fá færi á sér. Njarðvíkingar brutu ísinn með fallegu marki frá Kaj Leo um miðbik síðari hálfleiks. Þróttarar jafna leikinn af vítapunktinum eftir að dæmt hafi verið á Ibra Camara í baráttunni við Vilhjálm Kaldal. Njarðvíkingar klárlega svekktari með úrslitin og horfa á tvö töpuð stig meðan Þróttarar horfa á unnið stig.
Bestu leikmenn
1. Sigurjón Már Markússon
Var virkilega traustur í öftustu línu Njarðvíkinga. Ófá skipti sem hann náði að koma sér fyrir hættulegar sóknaraðgerðir Þróttara.
2. Vilhjálmur Kaldal Sigurðsson
Sótti vítið fyrir Þróttara og átti hörku skot í síðari sem markvörður Njarðvíkinga þurfti að hafa sig allan við að slá yfir. Var ógnandi og í hættulegustu færum Þróttara.
Atvikið
Þróttur fær vítaspyrnu sem verður bara að segjast að var virkilega klókt hjá þeim að sækja. Ódýrt í besta falli og annað brot undir lokin sem hefði mikið frekar verðskuldað þetta kall.
Hvað þýða úrslitin?
Njarðvíkingar eru áfram í öðru sæti deildarinnar með 25 stig. Þróttarar fara niður í 6.sætið með 19 stig.
Vondur dagur
Þórður Þorsteinn Þórðarson dómari verður eiginlega bara að taka þetta á sig. Ef maður hugsar tilbaka um leikinn eru hans ákvarðanir sem standa eftir mun frekar en að einhver leikmaður hafi ekki verið á deginum sínum.
Dómarinn - 3
Línan var ekki eins fyrir bæði lið virtist vera. Njarðvíkingar sópuðu á sig spjöldum á meðan Þróttarar sluppu fyrir sömu sakir oft. Vítaspyrnan sem Þróttur fékk var gjöf og þarf ekkert að fegra það neitt. Má segja að hafi jafnast út því undir lokin fer Þróttari niður í teignum sem virtist eiga vera klárt víti en ekkert dæmt. Jafnar samt ekki út mistök með öðrum mistökum og teymið missti tökin undir restina.