SKÝRSLAN: Stjörnumenn fara til Eistlands með forystu
Hvað réði úrslitum?
Stjörnumenn voru betra liðið stærsta hluta leiksins. Sköpuðu sér meira og voru bara betri út á vellinum. Voru klaufar að hleypa Paide inn í leikinn með vítinu en svöruðu fyrir það á unnu leikinn á endanum. Eru samt líklega svekktir að hafa ekki skorað fleiri mörk.
Bestu leikmenn
1. Emil Atlason
Emil flottur í dag. Elskar að skora í Evrópu og vill helst hafa þau tvö fyrst hann er að þessu. Ógnaði sífellt og var að valda alls konar vandræðum fyrir öftustu menn Paide.
2. Guðmundur Kristjánsson
Fyrirliðinn hrikalega traustur í dag. Stóð vaktina gríðarlega vel í vörninni og leiddi með góðu fordæmi.
Atvikið
Markið sem var dæmt af Stjörnumönnum í stöðunni 2-1. Gæti orðið ótrúlega dýrt þegar upp er staðið en það þarf víst að fá að koma í ljós.
Hvað þýða úrslitin?
Stjörnumenn fara með eins marks forystu til Eistlands í næstu viku. Sú forysta hefði getað verið meiri en við tökum því svo sem alveg.
Vondur dagur
Enginn einn sem öskrar á mann að hafi verið eitthvað sérstaklega slakur. Örvar Logi var óheppinn að fá boltann í höndina í vítinu og það er alltaf leiðinlegt og svo þurfti Óli Valur að fara meiddur út af eftir korter sem er sömuleiðis alltaf leiðinlegt. Annars var greyið hann Jérémy Muller eiginlega bara versti maður vallarins og þá sérstaklega í seinni hálfleik.
Dómarinn - 4
Úff, eftir að hafa fengið mikið lof frá fjölmiðlabúrinu í fyrri hálfleik þá missti Muller þetta alveg í seinni. Dæmdi auðvitað mark af Stjörnumönnum sem enginn skildi og flautaði alveg endalaust á stórum pörtum í seinni. Eftir að hafa haldið góðri línu framan af þá týndi hann henni eftir því sem leið á.