SKÝRSLAN: KA menn skemmdu endurkomu Túfa
Hvað réði úrslitum?
Valsmenn fengu færi til að komast yfir í upphafi leiks en KA menn nýttu sér það og náðu forystunni rétt áður en flautað var til loka fyrri hálfleiks. Valsmenn voru svo manni færri síðasta hálftímann og voru jafnvel meira með boltann eftir það en náðu ekki að skapa sér teljandi færi.
Bestu leikmenn
1. Steinþór Már Auðunsson
Frábær frammistaða í byrjun leiks þar sem hann varði tvö færi frá Tryggva Hrafni og Bjarna Mark. Var svo bara öryggið uppmálað heilt yfir.
2. Darko Bulatovic
Varnarleikur KA var gríðarlega öruggur í kvöld. Darko, Hans Viktor og Jakob Snær hefðu allir geta fengið annað sætið hér.
Atvikið
Það kom atvik upp í lok leiksins þegar Orri Sigurður Ómarsson fór af krafti inn í Jakob Snæ Árnason þar sem boltinn var hvergi nálægt. Dómararnir sáu ekki atvikið svo ekkert var gert í því.
Hvað þýða úrslitin?
KA hefur verið á góðu skriði og er komið að alvöru í baráttuna um sæti í efrihlutanum. Liðið er í 8. sæti, tveimur stigum á eftir ÍA sem situr í 6. sæti en á leik til góða gegn Vestra á morgun. Valur er hins vegar 11 stigum á eftir toppliði Víkings en eiga leik til góða.
Vondur dagur
Frederik Schram leit ansi illa út þegar hann fékk rauða spjaldið. Óð út í Viðar Örn þegar hann átti margt ógert, hefði betur verið rólegur á línunni. Jónatan Ingi átti erfitt uppdráttar og þá var Gylfi Þór Sigurðsson alveg týndur en hann hann gekk augljóslega ekki alveg heill til skógar.
Dómarinn - 8
Jóhann Ingi Jónsson flottur í kvöld. Var með rauða spjaldið á tæru.